भुजबळ यांच्याबद्दल हाणामारीची भाषा करणाऱ्याचा निषेध
समता परिषदेच्या पदाधिकाऱ्यांकडून संताप व्यक्त
निर्लज्जपणाचा कळस गाठणाऱ्या देशपांडेला समता सैनिक ठेचून काढणार -भरत गारुडकर
अहमदनगर (प्रतिनिधी)- राज्याचे मंत्री व समता परिषदेचे संस्थापक छगन भुजबळ यांच्या बाबत परशुराम संघाचे अध्यक्ष विश्‍वजीत देशपांडे यांनी केलेल्या बदनामीकारक वक्तव्याचा अखिल भारतीय महात्मा फुले समता परिषदेचे जिल्हा उपाध्यक्ष भरत गारुडकर यांनी निषेध व्यक्त केला आहे.
तर निर्लज्जपणाचा कळस गाठून वैचारिक लढाई करण्याऐवजी हाणामारीची भाषा करणाऱ्या व सामाजिक वातावरण बिघडवण्याचा प्रयत्न करणाऱ्या देशपांडेला समता सैनिक ठेचून काढणार असल्याचा इशारा दिला आहे.
परशुराम संघाचे अध्यक्ष विश्‍वजीत देशपांडे यांनी युवकांचे माथी भडकवण्यासाठी बेताल वक्तव्य केले आहे. समाजाचे नेते भुजबळ यांच्याबद्दल केलेले वादग्रस्त वक्तव्य ओबीसी व बहुजनांची अस्मितेवर घाला आहे. त्यांनी ओबीसीची ताकत आजमावून पहावी. कानाखाली काढण्यापूर्वी, तिथ पर्यंत पोहोचण्याआधीच राज्यातील समता सैनिक अशा प्रवृत्तींना ठेचून काढणार आहे. तो कोणत्याही बिळात लपला तरी, बिळातून बाहेर काढून त्याला धडा शिकवला जाणार असल्याचा इशारा गारुडकर यांनी दिला आहे.