निमगाव वाघा ग्रामपंचायतच्या वतीने अभिनंदनाचा ठराव; ग्रामसभेत सत्कार
अहिल्यानगर (प्रतिनिधी)- महात्मा फुले प्रबोधन मराठी साहित्य संमेलनच्या वतीने सामाजिक, शैक्षणिक, साहित्य, कला व क्रीडा क्षेत्रातील योगदानाबद्दल सामाजिक कार्यकर्ते पै. नाना डोंगरे यांना राज्यस्तरीय महात्मा फुले साहित्यरत्न पुरस्कार जाहीर करण्यात आला असल्याची माहिती संमेलनाचे मुख्य संयोजक दशरथ यादव यांनी दिली.
पुरस्कार जाहीर झाल्याबद्दल निमगाव वाघा (ता. नगर) ग्रामपंचायतच्या वतीने ग्रामपंचायत सदस्य पै. नाना डोंगरे यांचा अभिनंदनाचा ठराव घेण्यात आला. तर यावेळी सरपंच उज्वलाताई कापसे यांच्या हस्ते डोंगरे यांचा सत्कार करण्यात आला. यावेळी उपसरपंच किरण जाधव, ग्रामपंचायत अधिकारी प्रविण पानसंबळ, सोसायटीचे चेअरमन अतुल फलके, गणेश येणारे, संदिप गायकवाड, मुख्याध्यापिका शांता नरवडे, नवनाथ फलके, गणेश अंधारे, अनिल डोंगरे, संदेश शिंदे, अजय ठाणगे, सिमा फलके, पुष्पा फलके, अरुण कापसे, ज्ञानदेव कापसे, संतोष खांदवे, भाऊसाहेब जाधव आदींसह ग्रामपंचायत सदस्य व ग्रामस्थ उपस्थित होते.
स्व.पै. किसनराव डोंगरे बहुद्देशीय संस्थेचे अध्यक्ष तथा ग्रामपंचायत सदस्य पै. नाना डोंगरे यांचे नगर तालुक्यासह जिल्ह्यातील ग्रामीण भागात विविध क्षेत्रात कार्य सुरु आहे. संस्थेच्या माध्यमातून सामाजिक, शैक्षणिक, कला, क्रीडा, साहित्य व धार्मिक क्षेत्रात योगदान देत आहेत. ग्रामीण भागात वृक्षारोपण व वृक्षसंवर्धनासाठी विविध कार्यक्रम घेऊन संस्थेने पर्यावरण संवर्धनासाठी मोठी जनजागृती केली आहे. स्त्री जन्माचे स्वागत, स्वच्छता अभियान, महिला सक्षमीकरण, मतदार जागृती, जलसंधारण जागृती मोहिम व रक्तदान शिबीर व्यापक स्वरुपात राबविण्याचे कार्य सुरु आहे. तसेच युवकांसाठी व्यसनमुक्तीवर विविध उपक्रम घेऊन जनजागृती केली जात आहे. आरोग्य शिबिराच्या माध्यमातून गावपातळीवर ग्रामस्थांना आधार देण्याचे कार्य सुरु आहे. विविध स्पर्धा, महिला बचत गट मेळावे, युवा संमेलन घेऊन समाजाला दिशा देण्याचे कार्य संस्थेच्या माध्यमातून सुरु आहे. साहित्य चळवळीला चालना देण्यासाठी त्यांनी आठ राज्यस्तरीय काव्य संमेलन आणि तीन ग्रामीण मराठी साहित्य संमेलनाचे त्यांनी आयोजन केले होते. या कार्याची दखल घेऊन त्यांना राज्यस्तरीय महात्मा फुले साहित्यरत्न पुरस्कार जाहीर झाला आहे.
महात्मा फुले प्रबोधन मराठी साहित्य संमेलनच्या वतीने खानवडी (ता.पुरंदर जि. पुणे) येथे गुरुवारी दि.27 नोव्हेंबर होणाऱ्या कार्यक्रमात मान्यवरांच्या हस्ते डोंगरे यांना पुरस्काराने सन्मानित केले जाणार आहे.