पीपल्स हेल्पलाईनची “डिच्चू फत्ते कॅप्चर!” मोहीम
12 एप्रिलच्या जनलोक अदालतमध्ये, हुतात्मा स्मारक येथे सहभागी होण्याचे आवाहन
अहिल्यानगर (प्रतिनिधी)- देशासाठी रक्त सांडणाऱ्या सैनिकांच्या सन्मानाचे प्रतीक असलेली पदे काही व्यक्तींकडून केवळ नावापुरती वापरली जात असल्याची गंभीर बाब समोर आली आहे. “कॅप्टन” सारख्या संरक्षण दलातील पदांचा अनधिकृत वापर करून समाजात खोटी प्रतिष्ठा निर्माण केली जात असल्याने जनतेच्या मनात तीव्र संताप व्यक्त होत आहे.
या पार्श्वभूमीवर पीपल्स हेल्पलाईनतर्फे शहरातील हुतात्मा स्मारक येथे 12 एप्रिल 2026 रोजी सकाळी १० वाजता आयोजित जनलोक अदालतमध्ये “डिच्चू फत्ते कॅप्चर!” मोहिमेच्या माध्यमातून अशा खोट्या पदांचा पर्दाफाश केला जाणार असल्याची माहिती जेष्ठ विधिज्ञ ॲड. कारभारी गवळी यांनी दिली.
“कॅप्टन” पदाचा गैरवापर — राष्ट्राच्या सन्मानाला धक्का
“कॅप्टन” हे केवळ एक संबोधन नसून ते शौर्य, त्याग आणि राष्ट्रसेवेचे जिवंत प्रतीक आहे. अशा पदांचा गैरवापर करणे म्हणजे थेट भारतीय संरक्षण दलांच्या सन्मानाला धक्का देणे होय.
जनलोक अदालतने स्पष्ट इशारा दिला आहे की,
“खोट्या प्रतिष्ठेच्या आड लपलेले चेहरे आता कायद्याच्या चौकटीत उघड केले जातील.”
कायदेशीर व नैतिक चौकटीत कठोर निर्णय
जनलोक अदालततर्फे कठोर पण पूर्णतः कायदेशीर पद्धतीने ठराव घेऊन महत्त्वाचे निर्णय जाहीर करण्यात येणार आहेत.
संरक्षण दलांच्या पदांचा गैरवापर करणाऱ्यांनी तात्काळ तो थांबवावा, अन्यथा योग्य ती कारवाई केली जाईल, असे स्पष्ट करण्यात आले आहे.
“पदाचा सन्मान — राष्ट्राचा अभिमान” या विषयावर व्यापक जनजागृती मोहीमही राबविण्यात येणार आहे.
ही मोहीम बदनामीसाठी नाही — सत्यासाठी आहे
“ही अदालत कोणालाही बदनाम करण्यासाठी नाही, पण सत्य दडपण्यासाठीही नाही.”
नैतिकता आणि कायदेशीर चौकट यांचा समन्वय साधत न्याय मिळवण्यावर भर देण्यात येणार आहे.
NGI विरुद्ध निर्णायक लढा
समाजात पसरलेल्या चुकीच्या नॉन-जिनेटिक इन्फॉर्मेशन (NGI) विरुद्ध निर्णायक लढा उभारण्याचा निर्धार व्यक्त करण्यात आला आहे.
“डिच्चू फत्ते कॅप्चर” ही केवळ घोषणा नसून —
खोटेपणाच्या मुळावर प्रहार करून सत्य, पारदर्शकता आणि जबाबदारी पुनर्स्थापित करण्याची प्रक्रिया आहे, असे आयोजकांनी स्पष्ट केले.
जनतेला थेट सहभागाचे आवाहन
जनलोक अदालतच्या माध्यमातून नागरिकांना थेट सहभागाचे आवाहन करण्यात आले आहे.
जर कोणत्याही व्यक्तीकडून संरक्षण दलांच्या पदांचा गैरवापर होत असल्याचे आढळल्यास:
संबंधित पुरावे व माहिती सादर करावी
तक्रारी जनलोक अदालतसमोर मांडाव्यात
समाजातील खोट्या प्रतिष्ठेविरुद्ध एकत्रित आवाज उठवावा, असे आवाहन करण्यात आले आहे.
लढा व्यक्तीविरुद्ध नाही — मानसिकतेविरुद्ध आहे
हा लढा केवळ एका व्यक्तीविरुद्ध नसून समाजातील खोट्या प्रतिष्ठेच्या मानसिकतेविरुद्ध असल्याचे स्पष्ट करण्यात आले आहे. या मोहिमेसाठी अशोक सब्बन, ॲड. अमित थोरात, शाहीर कान्हु सुंबे, ॲड. लक्ष्मणराव पोकळे, वीर बहादूर प्रजापती, संतोष खामकर, ओम कदम, पोपट शेळके, धनंजय मडके, कैलास पठारे, ॲड. विद्या शिंदे, राजेंद्र कर्डिले, दिलीप घुले, प्रकाश गोसावी आदी प्रयत्नशील आहेत.