व्यावसायिक प्रशिक्षण देणाऱ्या शिक्षिकांचा सन्मान
महिलांच्या उद्योग-व्यवसायाला चालना देण्यासाठी मार्गदर्शन
अहमदनगर (प्रतिनिधी)- महिला व युवतींना विविध व्यावसायिक प्रशिक्षण देणाऱ्या भारत सरकारच्या कौशल्य विकास व उद्योजकता मंत्रालय (नवी दिल्ली) संचलित शहरातील जन शिक्षण संस्थेत शिक्षक दिन उत्साहात साजरा करण्यात आला. यावेळी महिला व्यावसायिक प्रशिक्षण देणाऱ्या महिलांचा सन्मान करण्यात आला. तर महिलांना उद्योग-व्यवसायाला बीज भांडवलासाठी बँकेची कर्ज योजना व विविध शासकीय योजनांची माहिती देण्यात आली.
निसबर्ड अंतर्गत प्रशिक्षण घेतलेल्या महिला प्रशिक्षिकांना प्रमाणपत्राचे वितरण करुन त्यांचा सन्मान करण्यात आला. तर क्षमता बांधणी कार्यशाळातंर्गत विविध प्रशिक्षण पूर्ण केलेल्या महिलांना प्रमाणपत्राचे वितरण करण्यात आले. जन शिक्षण संस्थेचे संचालक बाळासाहेब पवार यांच्या अध्यक्षतेखाली झालेल्या कार्यक्रमास जिल्हा उद्योग केंद्राचे उद्योग अधिकारी बालाजी बिराजदार, कार्यक्रम अधिकारी शफाकत सय्यद, कुंदा शिंदे, लेखापाल अनिल तांदळे, उषा देठे, विजय बर्वे, प्रशिक्षिका मंगल चौधरी, माधुरी घाटविसावे, स्नेहल गीते, शितल दळवी, सायली मेहता, अनुराधा आरसुळे, संपदा कुलकर्णी, जान्हवी टकले, ममता गड्डम, हर्षदा लोंढे, विद्या रोहोकले, नाजिया शेख, कल्याणी जायभाय, जिनत शेख, रेणुका कोटा, कविता तडके आदींसह प्रशिक्षणार्थी महिला व युवती मोठ्या संख्येने उपस्थित होत्या.
बाळासाहेब पवार म्हणाले की, देशाच्या प्रगतीमय वाटचालीत शिक्षकांचे मोलाचे योगदान आहे. गुरुशिवाय जीवनाला अर्थ नाही. गुरुंप्रती आदर व निष्ठा असणारे शिष्य जीवनात यशस्वी होतात. शिक्षक समाज घडवून दिशा देण्याचे कार्य करतात. जन शिक्षण संस्थेतील प्रशिक्षिका महिला व युवतींना पायावर उभे करुन सक्षमीकरणाचे कार्य करत असल्याचे त्यांनी सांगितले.
बालाजी बिराजदार म्हणाले की, महिला सक्षमीकरणासाठी जन शिक्षण संस्थेचे कार्य कौतुकास्पद आहे. महिला चिकाटी व जिद्दीने उद्योग, व्यवसायात आपले कर्तृत्व निर्माण करत आहे. महिलांना नोकरीपेक्षा उद्योग-व्यवसायात मोठ्या संधी निर्माण झाल्या असून, त्या दिशेने वाटचाल करण्याची गरज असल्याचे त्यांनी सांगितले. तर महिलांसाठी शासनाच्या विविध योजना, उत्पादन उद्योग, सेवा उद्योगाच्या भांडवलासाठी कर्ज योजना, सबसिडीची त्यांनी माहिती दिली.
प्रारंभी डॉ. सर्वपल्ली राधाकृष्णन यांच्या प्रतिमेस पुष्पहार अर्पण करुन अभिवादन करण्यात आले. जन शिक्षण संस्थेत मिळालेल्या प्रशिक्षणाने जीवनात एक आत्मविश्‍वास निर्माण झाला असून, अर्थाजन करुन स्वत:चा व्यवसाय थाटण्यास प्रेरणा मिळाल्याची भावना प्रशिक्षणार्थी युवतींनी व्यक्त केली.