विद्यार्थ्यांनी कृतीमागे लपलेले विज्ञान शोधावा -यशवंत डांगे
नगर (प्रतिनिधी)- कार्मेल कॉन्व्हेन्ट इंग्लिश मिडीयम स्कूलमध्ये 52 व्या शहरस्तरीय विज्ञान-गणित, पर्यावरण विषयक प्रदर्शनाचे उद्घाटन मनपा आयुक्त यशवंत डांगे यांच्या हस्ते झाले. याप्रसंगी जिल्हा परिषदेचे शिक्षणाधिकारी (योजना) बाळासाहेब बुगे, माध्यमिक विभागाचे उपशिक्षणाधिकारी आकाश दरेकर, कार्मेल कान्व्हेंट इंग्लिश मिडीअम स्कूलच्या व्यवस्थापक ॲड. शिजी जॉर्ज आदी उपस्थित होते.
प्रारंभी आकाशात फुगे सोडून व फीत कापून या प्रदर्शनाचे उद्घाटन करण्यात आले. विद्यार्थिनींनी स्वागत गीत सादर केले. कार्यक्रमाचे प्रास्ताविक मनपा शिक्षण मंडळाचे प्रशासनाधिकारी जुबेर पठाण यांनी केले. ते म्हणाले की, शाश्‍वत भविष्यासाठी विज्ञान व तंत्रज्ञान या विषयाअंतर्गत आपण आपल्या वैज्ञानिक, गणितीय संकल्पना व पर्यावरणपूरक उपक्रमांचे सादरीकरण करू शकता व आपल्या विचारांना चालना देऊ शकता. यातून विद्यार्थ्यांचा वैज्ञानिक दृष्टिकोन वाढेल व त्यांच्या चिकित्सक वृत्तीला वाव मिळणार असल्याचे स्पष्ट केले.
मनपा आयुक्त यशवंत डांगे म्हणाले की, मुलांनी कृतीच्या मागे लपलेले विज्ञान शोधावे. मोबाइलचा वापर करताना त्याचा योग्य वापर करा. तंत्रज्ञान आपल्यासाठी आहे, त्याचा सुयोग्य वापर आपल्याला यशाचा मार्ग दाखवितो. वेळेचे योग्य नियोजन करा, त्यांनी मायक्रोसॉफ्ट कंपनीचे सीईओ सत्या नडेला आणि गुगल कंपनीचे सीईओ सुंदर पीचई यांचे उदाहरण देऊन विद्यार्थ्यांना कामात सातत्य ठेवले आणि कृती मागील विज्ञान शोधले तर तुमच्यातून भावी वैज्ञानिक व जागतिक किर्तीचे व्यक्तीमत्व घडणार असल्याचे त्यांनी सांगितले.
यावेळी शहर मुख्याध्यापक संघाचे ज्ञानदेव बेरड, गणित अध्यापक संघाचे नवनिर्वाचित अध्यक्ष संजय कुमार निक्रड, ॲड. शिजी जार्ज यांनी विद्यार्थ्यांना शुभेच्छा दिल्या. कार्मेल स्कूलच्या वतीने सर्व मान्यवरांचा सत्कार करण्यात आला. आकाश दरेकर यांनी आपण प्रत्येक कृती वैज्ञानिक दृष्टिकोनातून केल्यास निश्‍चितपणे नवनिर्मिती होऊ शकणार असल्याचे सांगितले.
बाळासाहेब बुगे म्हणाले की, विज्ञान-गणित, पर्यावरण प्रदर्शन म्हणजे विचार समृद्ध करण्यासाठीची पायरी आहे. तिचा वापर करीत चालावे. स्वतःमध्ये काही कमी आहे? असे वाटत असल्यास स्वतः मधील न्यूनगंड बाजूला ठेऊन त्याला संधीत रुपांतर करण्याचे आवाहन केले. तर थॉमस अल्वा एडिसन या प्रसिद्ध शास्त्रज्ञाचे उदाहरण देऊन त्यांनी मुलांना शुभेच्छा दिल्या.
यावेळी कार्मेल स्कूलच्या मुख्याध्यापिका निशा जोसेफ, मनपा विषय तज्ञ अरुण पालवे, केंद्र समन्वयक चंद्रशेखर साठे, दादासाहेब नरवडे, समन्वयक महेश क्षीरसागर, विज्ञान संघटना अध्यक्षा काजल महांडुळे, गणित संघटना अध्यक्ष सुखदेव नागरे, सचिव शारदा होशिंग, अमोल देशमुख, उपाध्यक्ष विजय गरड, बाबासाहेब शिंदे, खजिनदार किशोर चाबुकस्वार, कार्यकारिणी सदस्य संदीप येणारे, एस.व्ही. नवले, क्रांती मुनदाणकर, दिपक शिंदे, रायकर, जालिंदर सातपुते, श्रीकांत शेलार, फरहा खान, कार्मेल स्कूलच्या चीफ कोऑर्डिनेटर मनीषा साळवी उपस्थित होत्या. कार्यक्रमाचे सूत्रसंचालन शारदा होशिंग यांनी केले. आभार मनिषा साळवी यांनी मानले.