विद्यार्थ्यांनी दाखवली कौशल्याची चुणूक
विद्यार्थिनींनी रांगोळीतून दिला सामाजिक संदेश
नगर (प्रतिनिधी)- अहमदनगर एज्युकेशन सोसायटी संचलित भाऊसाहेब फिरोदिया हायस्कूलमध्ये विद्यार्थ्यांच्या कलागुणांना व कल्पकतेला वाव देण्यासाठी कला, गणित-विज्ञान, भूगोल-पर्यावरण, रांगोळी प्रदर्शनाचे आयोजन करण्यात आले होते. देश विदेशात वास्तुविशारद म्हणून नावाजलेल्या अहिल्यानगरच्या कविता जैन यांच्या हस्ते या प्रदर्शनाचे उद्घाटन करण्यात आले. यावेळी विद्यालयाचे मुख्याध्यापक उल्हास दुगड, उपमुख्याध्यपिका आशा सातपुते, पर्यवेक्षक बाळासाहेब वाव्हळ, विष्णू गिरी, कैलास साबळे, शिक्षक प्रतिनिधी उज्ज्वला भंडारी, विद्यार्थी प्रतिनिधी ओंकार चेमटे, विद्यार्थिनी प्रतिनिधी श्रुती रकटाटे उपस्थित होते.

विद्यार्थिनींनी उत्कृष्ट रांगोळी रेखाटून स्त्री भ्रुण हत्या, पर्यावरण रक्षण व महिलांवरील अत्याचार थांबविण्याचा सामाजिक संदेश दिला. गणित-विज्ञान व भूगोल पर्यावरण प्रदर्शनात विद्यार्थ्यांनी विविध प्रकल्प सादर करुन आपल्यातील कल्पनाशक्ती व कौशल्याची चुणूक दाखवली. तर कुंचल्यातून कागदावर रेखाटलेल्या चित्र हुबेहूब जिवंत केले, तसेच मंदिर व विविध वास्तूंचे मॉडेल तयार करण्यात आले होते. या प्रदर्शनास शिक्षक व पालकांनी भेट देऊन विद्यार्थ्यांच्या कलागुणांचे कौतुक केले.

विद्यार्थ्यांनी या प्रदर्शनासाठी भरपूर मेहनत घेऊन अध्यापक व पालकांच्या मार्गदर्शनाखाली कलाकृती व प्रकल्प सादर केले. विद्यार्थ्यांनी विविध कलाकृती व प्रकल्प साकारुन मोबाईल पासून दूर कसे राहता येईल, याचा संदेश कविता जैन यांनी उद्घाटनाप्रसंगी दिला. तर प्रदर्शन हे जरी एक दिवसासाठी भरवले जात असले तरी त्यासाठी अगोदर महिनाभर विद्यार्थ्यांना प्रचंड मेहनत करावी लागते. यातूनच भविष्यात फक्त अन्न, वस्त्र, निवारा या गोष्टींना महत्त्व न देता कलेलाही महत्त्व दिले पाहिजे तसेच या विद्यालयाचे विद्यार्थी मेहनतीच्या जोरावर विद्यालयाचे नाव भविष्यात उज्ज्वल करतील असा विश्वास त्यांनी व्यक्त केला.
व्यक्तिचित्र, वारली चित्र, पेन्सिल शेडिंग इ. प्रकारचे चित्र विद्यार्थ्यांनी काढलेली होती. तसेच ज्वालामुखी, पिन होल कॅमेरा, विद्युत लिफ्ट यासारखे प्रयोगांचे प्रात्यक्षिक विद्यार्थ्यांनी आपल्या मॉडेलच्या माध्यमातून दाखविले. भाऊसाहेब फिरोदिया हायस्कूलच्या शाळेची प्रतिकृती, महाकालेश्वर मंदिर प्रतिकृती व श्रीराम मंदिराची प्रतिकृती या हस्तकलेच्या वस्तू प्रदर्शनाचे आकर्षण ठरले. मोठ्या प्रमाणात विद्यार्थ्यांचा सहभाग या प्रदर्शनातून दिसून आला.
प्रदर्शनात सहभागी विद्यार्थ्यांचे अ.ए.सो. चे प्रमुख कार्यवाह छायाताई फिरोदिया, उपाध्यक्ष अशोक मुथा, खजिनदार प्रकाश गांधी, सहकार्यवाह गौरव फिरोदिया यांनी कौतुक केले.
