शिवजयंतीचा उपक्रम
शिवरायांचे विचार मुलांमध्ये रुजविणे काळाची गरज – सुमित लोंढे
नगर (प्रतिनिधी)- केडगाव येथील ज्ञानसाधना गुरुकुलच्या वतीने छत्रपती शिवाजी महाराज यांच्या जयंतीनिमित्त शिवदिंडी उत्साहात काढण्यात आली. पारंपारिक पद्धतीने चिमुकल्या विद्यार्थ्यांची मिरवणुक रंगली होती. यावेळी सुमित लोंढे युवा मंचच्या वतीने विद्यार्थ्यांना शैक्षणिक साहित्याचे वाटप करण्यात आले.
या मिरवणुकीत छत्रपती शिवराय, राजमाता जिजाऊ, सईबाई, प्रभू श्रीराम, लक्ष्मण, सीता अशी वेशभूषा परिधान केलेले विद्यार्थी सहभागी झाले होते. आकर्षक पध्दतीने शिवरायांची पालखी कार्यक्रमाचे प्रमुख आकर्षण ठरली. ज्ञानसाधना गुरुकुल क्लास ते मोहिनीनगर असा दिंडीचा मार्ग होता. यावेळी केडगाव येथील ग्रामस्थांनी मिरवणुकीच्या वेळी ठीक-ठिकाणी छत्रपतींच्या पालखीचे स्वागत केले. साईसेवा मंडळ व महिला मंडळ यांच्या वतीने शिवरायांच्या पालखीचे पूजन करून महाआरती करण्यात आली. मिरवणूक देवी मंदिराजवळ आली असता जगदंबा तरुण मंडळ व शिवमुद्रा ग्रुप तसेच केडगाव ग्रामस्थांच्या वतीने दिंडीचे स्वागत करण्यात आले.
सुमित लोंढे म्हणाले की, ज्ञानसाधना गुरुकुलने सुरु केलेली शिवदिंडीची संकल्पना कौतुकास्पद आहे. या शैक्षणिक संकुलात शिक्षणाबरोबर भारतीय संस्कृतीचे जतन करुन शिवजयंती सारखे विविध उत्सव साजरे केले जातात. दरवर्षी नवनवीन उपक्रमांच्या माध्यमातून तिचे स्वरूप व्यापक होत चालले आहे. तरुण पिढीने शिवजयंती साजरी करताना शिवरायांचे विचार आत्मसात केले पाहिजेत. डीजे लावून नाचण्यापेक्षा पुस्तक वाचून शिवरायांचे विचार समजतील, असे ते म्हणाले.
यावेळी मनपा स्थायी समितीचे माजी सभापती मनोज कोतकर, मुख्याध्यापक संदीप भोर, उद्योजक जालिंदर कोतकर, ज्ञानसाधना गुरुकुलचे संचालक प्रा. प्रसाद जमदाडे, दिपक तागडे, अनिल ठुबे, सागर वाव्हळ, ओम कॉम्प्युटरचे काळे सर, गुलाब कोतकर, तुषार कोतकर, नितीन ठुबे, शाहरुख शेख आदीसह ज्ञानसाधना गुरुकुलचे सर्व शिक्षक, लंडन किड्स शाळेचे सर्व शिक्षक, विद्यार्थी पालक मोठ्या संख्येने उपस्थित होते.