केंद्र सरकारच्या सर्व योजनांची माहिती नमो ॲपद्वारे घरबसल्या मिळणार -सविता कोटा
अहमदनगर (प्रतिनिधी)- पद्मशाली स्नेहिता संघमच्या वतीने शहरात झालेल्या हळदी-कुंकूच्या कार्यक्रमात केंद्र शासनाच्या सर्व कल्याणकारी योजना घरोघरी पोहचविण्यासाठी नरेंद्र मोदी (नमो) ॲपची माहिती देण्यात आली. भाजपच्या शहर जिल्हा सरचिटणीस तथा नमो ॲपच्या संयोजक सविता कोटा यांनी महिलांना या ॲपबद्दल मार्गदर्शन केले.
गांधी मैदान येथील श्री मार्कंडेय शाळेच्या सभागृहात झालेल्या कार्यक्रमाप्रसंगी क्रीडा अधिकारी दिपाली बोडखे, इनरव्हील क्लब ऑफ अहमदनगरच्या अध्यक्षा श्रीलता आडेप, वेलनेस क्लबच्या ज्योती भोजणे, स्त्रीरोग तज्ञ डॉ. नयना जगताप, पद्मशाली स्नेहिता संघमच्या अध्यक्षा डॉ. रत्ना बल्लाळ, उपाध्यक्षा रेखा वडेपेल्ली, सचिव सपना छिंदम आदींसह महिला मोठ्या संख्येने उपस्थित होत्या.
सविता कोटा म्हणाल्या की, नमो ॲपच्या माध्यमातून सर्वसामान्य जनतेपर्यंत केंद्र सरकारच्या कल्याणकारी योजनांची माहिती मिळणार आहे. तर सर्वसामान्य नागरिक या ॲपच्या माध्यमातून थेट पंतप्रधानांशी जोडला जाणार आहे. केंद्र सरकारच्या सर्व योजना घरबसल्या सर्वांना माहिती होणार आहे. महिलांनी याबाबत माहिती घेऊन आपल्या कुटुंबासाठी त्याचा लाभ घेण्याचे त्यांनी स्पष्ट केले. तर हा ॲप मोबाईलमध्ये डाऊनलोड करुन कसा वापरावा यावर सविस्तर माहिती दिली.
पद्मशाली स्नेहिता संघमच्या अध्यक्षा डॉ. रत्नाताई बल्लाळ यांनी संस्थेच्या माध्यमातून महिलांच्या सर्वांगीन विकासासाठी मागील 23 वर्षापासून कार्य सुरु आहे. महिला फक्त मनोरंजनापुरते एकत्र येत नसून, समाजाला दिशा देण्यासाठी सामाजिक भान ठेऊन योगदान दिले जात असल्याचे त्यांनी स्पष्ट केले. स्त्रीरोग तज्ञ डॉ. नयना जगताप यांनी घरातील महिला आनंदी, निरोगी असेल तर संपूर्ण कुटुंबाचे स्वास्थ्य चांगले राहते. महिलांनी इतर कामकाजासह गृहकर्तव्य बजवताना स्वत:च्या आरोग्याबाबतही तितकेच जागरूक राहण्याचे आवाहन करुन आरोग्यावर मार्गदर्शन केले.
पाहुण्यांचा परिचय मोना मोरे यांनी करून दिला. कार्यक्रमाचे सूत्रसंचालन सरोजीनी रच्चा यांनी मानले. आभार आरती छिंदम यांनी मानले.