गाव विकासाच्या दिशेने महत्त्वपूर्ण पाऊल, विविध योजनांचे थेट प्रात्यक्षिक
नगर (प्रतिनिधी)- चिचोंडी पाटील (ता. नगर) येथे सरपंच शरदभाऊ खंडेराव पवार यांच्या मार्गदर्शनाखाली ऑगस्ट क्रांती पंधरवडा व ग्रामस्वराज्य अभियान मोठ्या उत्साहात साजरा केला जात आहे. 1 ऑगस्ट ते 15 ऑगस्टदरम्यान आरोग्य, कृषी, महिला-शिक्षण, महसूल अशा विविध क्षेत्रातील योजनांचा लाभ थेट गावात दिला जात असून, 2.11 कोटी रुपयांच्या योजनांचे उद्घाटन व कार्यारंभ याच पंधरवड्यात करण्यात आले आहे. नव्याने वाढलेल्या गावातील लोकवस्तींना याचा लाभ मिळणार आहे. या अभियानास ग्रामस्थांचा उत्स्फूर्त प्रतिसाद मिळत आहे.
1 ऑगस्ट रोजी या पंधरवड्याचा शुभारंभ सरपंच शरदभाऊ पवार यांच्या हस्ते गावातील महिला भगिनी, सेविका आणि ज्येष्ठ नागरिकांच्या उपस्थितीत चुल पेटवून करण्यात आला. यानंतर निर्मल ग्रामस्वच्छता अभियान अंतर्गत संपूर्ण गाव, शाळा, मंदिरे, अंगणवाडी व अमरधाम येथे स्वच्छता व जनजागृती मोहिम राबवण्यात आली. 2 हजार कचराकुंड्यांचे घरोघरी वाटप ग्रामपंचायतीतर्फे करण्यात आले.
2 ऑगस्ट रोजी झाडे लावा, झाडे जगवा या घोषवाक्याखाली वृक्ष संवर्धन समितीच्या मार्गदर्शनात नारळ व वडाचे झाडे लावण्यात आले. मोतीबाग परिसरात अनेकांनी आपल्या वडिलांच्या स्मरणार्थ वृक्षारोपण केले. 3 ऑगस्ट रोजी तालुका पुरवठा अधिकारी शिवराज पवार यांच्या उपस्थितीत शासनाच्या अन्नधान्य योजनांची माहिती देण्यात आली. 99 नव्या लाभार्थ्यांना धान्य सुरू करून देण्यात आले. यावेळी रेशनकार्डाशी संबंधित अडचणींवर कार्यवाही करण्यात आली. 4 ऑगस्ट रोजी गावातील शेतांवर जाऊन माती परीक्षण, पीक मार्गदर्शन व लसीकरण शिबीर घेण्यात आले. कृषी अधिकारी गीते, पशुवैद्यकीय अधिकारी डॉ. गडाख यांच्या मार्गदर्शनात समृद्धी डेअरी फार्मवर जनावरांची तपासणी पार पडली.
5 ऑगस्ट रोजी संजय गांधी निराधार योजना, विधवा डोल, वयोवृद्धांना सहाय्यक योजना तसेच डाक विभागाच्या सेवांबाबत ग्रामस्थांना माहिती व मार्गदर्शन करण्यात आले. 6 ऑगस्ट रोजी आयुष्मान भारत वंदना योजना अंतर्गत आरोग्य शिबीर घेण्यात आले. 200 ग्रामस्थांना आयुष्मान भारत कार्ड मिळाले, तर 15 नेत्ररुग्णांचे ऑपरेशन नगर येथे पाठवून करण्यात येणार आहे. डॉ. महेश कोकाटे यांच्यासह आरोग्य विभागाने अभियानाचे कौतुक केले.
या उपक्रमांची शृंखला पुढेही सुरूच राहणार आहे. ऑगस्ट क्रांती पंधरवड्यात येत्या दिवसांत डिजिटल सेवा दिन, महसूल क्रांती दिन, महिला व बालकल्याण दिन, ग्रामपंचायत स्थापनादिन, विद्यार्थी-पालक शिक्षण दिन, महाश्रमदान दिन आदी उपक्रम राबवले जाणार असल्याची माहिती सरपंच शरदभाऊ पवार यांनी दिली.
या विविध उपक्रमांमुळे प्रशासन आणि नागरिक यांच्यातील विश्‍वास दृढ झाला असून, चिचोंडी पाटील ग्रामपंचायत ही राज्यातील अशी पहिली ग्रामपंचायत ठरत आहे. जी इतक्या मोठ्या प्रमाणात विविध शासकीय योजनांचे थेट अंमलबजावणी गावपातळीवर करत आहे. या उपक्रमांची परिसरात मोठी चर्चा असून, गाव सर्वांगिण विकासाच्या दिशेने वाटचाल करत असल्याचेही सरपंच पवार म्हणाले.
100% मतदार नोंदणी व आयुष्मान भारत कार्ड मोहिमा, प्रत्येक चौकात व अंगणवाड्यांमध्ये सीसीटीव्ही बसवणे, शाळांतील विद्यार्थ्यांचे प्रश्‍न सोडवण्यासाठी एक दिवस सरपंच उपक्रम!, शासकीय अधिकारी/कर्मचाऱ्यांची माहिती व तक्रार पेट्या उपलब्ध करणे आणि 14 ऑगस्टला महाश्रमदान दिन साजरा करून सार्वजनिक स्वच्छता करण्यात येणार आहे.