धर्मवीर संभाजीराजे प्रतिष्ठानच्या कार्यकर्त्यांचा उपक्रम
किल्ल्यावर उभा केला शिवकालीन इतिहास
नगर (प्रतिनिधी)- दिवाळी आणि किल्ले हे मुलांचे समीकरणच बनलेले असताना, शहरातील गाडळकर मळा येथे धर्मवीर संभाजीराजे प्रतिष्ठानच्या कार्यकर्त्यांनी छत्रपती शिवाजी महाराज यांच्या स्वराज्याची पहिली राजधानी असलेल्या राजगड किल्ल्याची भव्य प्रतिकृती साकारली आहे. या किल्ल्याची हुबेहुब प्रतिकृती साकारुन शिवकालीन इतिहास रेखाटण्यात आला असून, किल्ला पाहणाऱ्यांना शिवकालीन राजगडावर आल्याचा भास होत आहे.
12 बाय 15 फुटाचा किल्ला मुलांनी शिवकालीन इतिहासाचा सुक्ष्मपणे अभ्यास करुन बनवला आहे. 60 ते 70 पोते माती, दगड व विटांचा वापर करुन हा किल्ला बनविण्यात आला आहे. किल्ला बनविण्यासाठी तीन दिवस कार्यकर्ते अहोरात्र झटत होते. बुरुज, मावळे, राजगडाचे तीन दरवाजे व किल्ल्यामागे वसलेले गाव राजगडाचा इतिहास जिवंत करत आहेत. या किल्ल्यात महाद्वार, मध्यभागी बालेकिल्ला, चोरवाट, हत्ती खडक, चिलखत बुरुज, पद्मावती तलाव, मंदिर व बारूद कोठार आदी विविध गोष्टींचा समावेश आहे.
प्रतिष्ठानचे मार्गदर्शक दत्ता गाडळकर व अध्यक्ष सिद्धेश झावरे यांच्या मार्गदर्शनाखाली किल्ला बनविण्यात आला आहे. यामध्ये तन्मय गोबरे, श्रेयस कांडेकर, सर्वेश गाडळकर, संस्कार दाऊभट, आर्यन एकाडे, पृथ्वी सुपेकर, दर्शन पाटील, राजवीर गाडळकर, अर्णव एकाडे, शंभू गायकवाड, स्वराज घोलप, ओम भोजने, आरव गाडळकर, सिद्धेश झावरे, ओम देवकर, अमय राखुंडे, सुजल रसाळ, यश गारुडकर, तेजस गोबरे, शंतानू गाडळकर, सुजित लालगे, दिग्विजय मांडगे यांनी किल्ला बनविण्यासाठी विशेष परिश्रम घेतले.
दत्ता गाडळकर म्हणाले की, आजच्या पिढीला आपल्या पूर्वजांचा इतिहास ज्ञात होण्यासाठी राजगड किल्ला उभारण्यात आला आहे. मुलांनी देखील मोठ्या उत्साहात अभ्यासपूर्ण पध्दतीने किल्ला साकारला आहे. किल्ला बनविताना छत्रपती शिवाजी महाराजांनी स्वराज्य निर्माण करण्यासाठी घेतलेले कष्ट व प्रचंड मेहनत याची देखील जाणीव किल्ला उभारताना झाली. मोबाईलमध्ये अडकलेल्या मुलांना मैदानाकडे घेऊन जाण्यासाठी आपल्या पारंपारिक खेळाची आवड निर्माण करावी लागणार असल्याचे त्यांनी सांगितले.
दिवाळीच्या पार्श्‍वभूमीवर साकारण्यात आलेल्या राजगड किल्ल्याचा वैभव पाहण्यासाठी परिसरातील अबालवृध्दांसह नागरिक गर्दी करत आहे.