प्रकाश गुरुपूरबनिमित्त गुरुद्वारा भाई दया सिंगजी, गोविंदपुरा येथे भाविकांची दर्शनास गर्दी
विविध धार्मिक, सामाजिक कार्यक्रम भक्तीमय वातावरणात पार
अहिल्यानगर (प्रतिनिधी)- अहिल्यानगर येथील गुरुद्वारा भाई दया सिंग जी, गोविंदपुरा मध्ये धन धन श्री गुरु नानक देवजी महाराज यांची 556 वी जयंती म्हणजेच प्रकाश गुरुपूरब उत्साहात व भक्तीमय वातावरणात साजरा करण्यात आला. यावेळी विविध धार्मिक व सामाजिक कार्यक्रम पार पडले.
28 ऑक्टोबर ते 01 नोव्हेंबर या कालावधीत रोज सकाळी प्रभात फेऱ्या शहरातील विविध मार्गांवरून काढण्यात आल्या. संगतांनी मोठ्या संख्येने सहभागी होऊन “वाहेगुरु, वाहेगुरु, धन गुरू नानक” या जयघोषात नगर शहरातील वातावरण भक्तीमय केले. संगतांच्या सहभागातून सांझा अखंड पाठ साहिब करण्यात आली. त्यानंतर रोज संध्याकाळी कीर्तन दरबार आयोजित करण्यात आला होता, ज्यामध्ये प्रसिद्ध कीर्तन जथा भाई गुरविंदर सिंगजी (रुद्रपूर वाले) व हजूरी रागी भाई अमृतसिंगजी जथ्था यांनी तीन दिवस सतत आपल्या मधुर स्वरांमधून गुरबाणीचे अमृतवचन सादर करून भाविकांना मंत्रमुग्ध केले.
गुरुद्वारा परिसरात तीन दिवस लंगर सेवा सुरु होती, ज्यामध्ये हजारो भक्तांनी सहभागी होऊन प्रसाद ग्रहण केला. तसेच सेवादारांच्या वतीने रक्तदान शिबीर आयोजित करण्यात आले होते. ज्यामध्ये अनेक भाविकांसह युवकांनी उत्साहात रक्तदान केले. या समारंभात समाजातील विशेष कार्य आणि योगदानाबद्दल ” नारंग ब्रदर्स यांना “समाज रत्न पुरस्कार पंजाबी परिवाराच्या वतीने प्रदान करण्यात आला.
या जयंती सोहळ्यानिमित्त आमदार संग्राम जगताप यांनी गुरुद्वाराला भेट देऊन दर्शन घेतले. जयंतीच्या शुभेच्छा देताना आमदार जगताप म्हणाले की, आपली भूमी ही साधू-संतांच्या पदस्पर्शाने पावन झाली आहे. धर्माचे विचार पुढे घेऊन जात, पंजाबी समाजाने नेहमीच संकट काळामध्ये राष्ट्र उभारणीत मदत केली आहे. श्री गुरुनानक देवजी महाराज यांची शिकवण, विचारधारा पुढच्या पिढीकडे घेऊन जायची आहे. त्यांच्या विचारातून चांगल्या कामाची प्रेरणा व ऊर्जा मिळत असल्याचे त्यांनी सांगितले. तसेच खासदार निलेश लंके यांनी दर्शन घेऊन समाजबांधवांना जयंतीच्या शुभेच्छा दिल्या. यावेळी पोलीस उपाधीक्षक डॉ. दिलीप टिपरसे, आर्मी इंटेलिजन्सचे मेजर चंद्रशेखर, माजी महापौर अभिषेक कळमकर, माजी उपमहापौर गणेश भोसले, संजय चोपडा, योगीराज गाडे उपस्थित होते.
गुरुद्वारा समितीचे आणि शीख समाजाचे अध्यक्ष स. बलदेव सिंग वाही यांनी उपस्थित सर्व भाविक, कीर्तन जथ्था, सेवादार, मान्यवर तसेच सर्व सहकार्य करणाऱ्या संस्थांचे मनःपूर्वक आभार मानले. त्यांनी सांगितले की, गुरु नानक देवजींचा उपदेश “किरत करो नाम जपो, वंड छको” समाजासाठी प्रेरणादायी आहे, आणि सर्वांनी या शिकवणुकीनुसार जीवन जगावे, हेच गुरू महाराजांचे खरे आशीर्वाद असल्याचे त्यांनी सांगितले.
कार्यक्रमाच्या यशस्वीतेसाठी गुरुद्वारा भाई दया सिंगजी समितीच्या सर्व सेवादारांनी अत्यंत प्रेम, निष्ठा आणि समर्पणाने योगदान दिले. याप्रसंगी स्थानिक सामाजिक संस्था, विविध प्रतिनिधी तसेच बाहेरगावाहून आलेल्या भाविकांनी मोठ्या संख्येने हजेरी लावली होती.