सेवानिवृत्तीनंतर देखील पाहत होते कारभार
विरोधी संचालकांच्या तक्रारीवरुन उचलबांगडी
वाजिद शेख अहमदनगर (प्रतिनिधी)- अहमदनगर जिल्हा माध्यमिक शिक्षक सोसायटी मधील दोन संचालकांचे सभासदत्व रद्द करण्याचे आदेश जिल्हा उपनिबंधक गणेश पुरी यांनी काढले आहे. संस्थेचे संचालक धोंडीबा खंडू राक्षे व काकासाहेब मुरलीधर घुले हे शिक्षक म्हणून सेवानिवृत्त झाले असताना देखील सोसायटीत संचालक म्हणून कार्यरत होते. विरोधी संचलकांनी जिल्हा उपनिबंधक कार्यालयाकडे केलेल्या तक्रारीवरुन त्यांचे संचालक व सभासदत्व रद्द करण्यात आले आहे.
माध्यमिक शिक्षक सोसायटीचे संचालक धोंडीबा राक्षे हे 31 मे 2023 रोजी व काकासाहेब घुले हे 31 मे 2024 रोजी निवृत्त झालेले होते. संस्थेच्या घटनेच्या उपविधीनुसार ज्या दिवशी शिक्षक निवृत्त होतो, त्याच दिवशी त्याचे सभासद व रद्द होत असते. परंतु या दोन्ही संचालकांनी अजूनही आपले संचालकपद कायम ठेवलेले होते. यावरुन विरोधी संचालक आप्पासाहेब शिंदे, बाबासाहेब बोडखे, महेंद्र हिंगे व वसंत खेडकर या संचालकांनी त्यांच्या विरोधात जिल्हा उपनिबंधक कार्यालयाकडे तक्रार करुन, सेवानिवृत्त झालेले दोन्ही संचालक संस्थेच्या घटनेचे उल्लंघन करुन संचालक पदाचा दुरुपयोग करीत असल्याचा आरोप केला होता. तर संस्थेच्या घटनेनुसार दोन्ही संचालकांचे सभासदत्व व संचालक पद रद्द करण्याची मागणे केली होती.
या तक्रारीची दखल घेऊन महाराष्ट्र सहकारी संस्था अधिनियम 1960 व नियम 1961 मधील तसेच संस्थेच्या मंजूर उपविधीतील तरतुदीस अनुसरून राक्षे व घुले यांचे सभासदत्व संपुष्टात येत असल्याचे जिल्हा उपनिबंधक यांनी पत्रात म्हंटले आहे. तर याबाबत कार्यवाही करण्याचे लेखी पत्र सोसायटीचे चेअरमन व व्यवस्थापकांना काढले आहे.