सामाजिक कार्य करणार्‍यांचा सावित्री ज्योती गौरवाने सन्मान
भविष्यात सुदृढ आरोग्य, हीच सुखी कुटुंबाची संपत्ती -पद्मश्री पोपट पवार
अहमदनगर (प्रतिनिधी)- पाश्‍चात्य संस्कृतीच्या आहार व जीवन पध्दतीने भारतीयांचे आरोग्य बिघडले असून, स्वयंपाक गृह आरोग्यदायी होण्यासाठी पुन्हा पारंपारिक अन्नाची गरज आहे. भविष्यात सुदृढ आरोग्य, हीच सुखी कुटुंबाची संपत्ती राहणार आहे. रासायनिक खतामुळे मातीचे आरोग्य बिघडले याचा विपरीत परिणाम आरोग्यावर होत असल्याचे प्रतिपादन पद्मश्री पोपट पवार यांनी केले.
सावित्री ज्योती महोत्सव व बचतगट उत्पादन प्रदर्शनाच्या समारोपप्रसंगी पद्मश्री पवार बोलत होते. यावेळी प्रमुख पाहुणे म्हणून प्रसिद्ध सिने चित्रपट निर्माते बाळासाहेब बांगर, ज्येष्ठ विधीज्ञ अ‍ॅड. प्रशांत साळुंके, उद्योजक संजय गवारे, राज्य क्रीडा मार्गदर्शक विशाल गर्जे, लावणी सम्राज्ञी रोहिणी थोरात, राज्य आदर्श युवती पुरस्कार प्राप्त जयश्री शिंदे, मुख्य संयोजक अ‍ॅड. महेश शिंदे, पोपट बनकर आदी उपस्थित होते.
पुढे बोलताना पद्मश्री पवार म्हणाले की, सामाजिक कार्यकर्त्यांना पुरस्कारातून प्रेरणा मिळत असते. ही प्रेरणा इतरांसाठी दिशादर्शक ठरते. महापुरुषांची जयंती डीजेच्या तालावर ठेका धरण्यापेक्षा, समाजाचा तोल सांभाळून सावरणार्‍या युवकांची समाजाला गरज आहे. राष्ट्रपुरुषांनी जात, धर्म न मानता समाज समोर ठेवून कार्य केले. त्यांना समाजापुरते मर्यादित न ठेवता, त्यांचे विचार आत्मसात करण्याची गरज आहे. युवकांना व्यसनापासून दूर करण्यासाठी वाचनालय कडे घेऊन जाण्याची गरज आहे. व्यसनाधीन तरुणांकडून समाजाला अधिक धोका आहे. पर्यावरणाचे प्रश्‍न देखील गंभीर होत असताना, भविष्यात मुलांच्या बॅगेत पाण्याच्या बॉटलऐवजी ऑक्सिजनचे नळकांडे ठेवण्याची वेळ येऊ नये हा धोका त्यांनी सांगितला. तर सोशल मीडियामुळे समाज संस्कारहीन व असुरक्षित होत असल्याचे त्यांनी स्पष्ट केले.
सावेडी येथी कोहिनूर मंगल कार्यालयात सुरु असलेल्या सावित्री ज्योती महोत्सवात पद्मश्री पवार यांच्या हस्ते विविध क्षेत्रात सामाजिक कार्य करणार्‍यांना सावित्री ज्योती गौरव 2022 पुरस्काराचे वितरण करण्यात आले. सेमी पैठणी साडी, स्मृतीचिन्ह, सन्मानपत्र असा पुरस्काराचा स्वरूप होता. पाहुण्यांनी यावेळी महिला बचतगट उत्पादन प्रदर्शनाला भेट देऊन विविध उत्पादनांची माहिती घेतली.
प्रास्ताविकात अ‍ॅड. महेश शिंदे यांनी महिला सक्षमीकरणाला प्रोत्साहन देण्यासाठी सावित्री ज्योती महोत्सव व बचतगट उत्पादन प्रदर्शनाचे आयोजन करण्यात आले होते. महिलांनी तयार केलेल्या उत्पादनांना हक्काची बाजार पेठ मिळण्याच्या हेतूने हा उपक्रम राबविला जातो. लोकसहभागातून हा महोत्सव यशस्वी करण्यात आला असून, सामाजिक कार्य करणार्‍या व्यक्तींचा पुरस्काररुपाने गौरव करण्यात आला असल्याचे त्यांनी स्पष्ट केले.
चित्रपट निर्माते संजय बांगर म्हणाले की, सत्यशोधक चित्रपटातून महात्मा फुले व सावित्रीबाई फुले यांचे विचार समाजात रुजविण्याचा प्रयत्न करण्यात आला आहे. या महान व्यक्तींचे विचार घेऊन समाजाने वाटचाल केल्यास समाजाला दिशा मिळणार आहे. सावित्री ज्योती महोत्सवातून महिलांना प्रोत्साहन देण्याचा उपक्रम कौतुकास्पद असल्याचे त्यांनी सांगितले.
कार्यक्रमाचे सूत्रसंचालन डॉ. अमोल बागुल यांनी केले. आभार पोपट बनकर यांनी मानले. सावित्री ज्योती महोत्सव यशस्वी करण्यासाठी दिनेश शिंदे, अश्‍विनी वाघ, मेजर भिमराव उल्हारे, स्वाती बनकर, सुदर्शन बनकर, रावसाहेब मगर, शाहीर कान्हू सुंबे, अनंत द्रविड, मीना म्हसे, आरती शिंदे, भारती शिंदे, प्रा. सुनील मतकर, स्वाती डोमकावळे, रजनी ताठे, निलेश रासकर, विनायक निवसे, इसाभाई शेख, रमेश गाडगे, सिद्धार्थ चव्हाण, शेखर होले, जयश्री कुलथे, सचिन गुलदगड, अ‍ॅड. सुनील तोडकर, अमोल तांबडे, गायत्री पुंड, गौरव डौले, तुषार शेंडगे, ईश्‍वर झांबरे, आंचल आंबेडकर, रूपाली गिरवले आदींनी परिश्रम घेतले.
