व्यक्तिगत भांडणांना जातीयवादी रंग दिला जात असल्याचा आरोप
मुस्लिम समाजाच्या शिष्टमंडळाने घेतली जिल्हाधिकारी व पोलीस अधीक्षकांची भेट
अहमदनगर (प्रतिनिधी)- व्यक्तिगत भांडणांना जातीयवादी रंग देऊन शहराचे वातावरण बिघडविण्याचा षडयंत्र करणार्‍यांवर कारवाई करण्याची मागणी समस्त मुस्लिम समाजाच्या वतीने करण्यात आली. शुक्रवारी (दि.20 जानेवारी) मुस्लिम समाजाच्या शिष्टमंडळाने जिल्हाधिकारी डॉ. राजेंद्र भोसले व जिल्हा पोलीस अधीक्षक राकेश ओला यांची भेट घेऊन सदर प्रश्‍नावर चर्चा करुन निवेदन दिले.
यावेळी हाजी शौकत तांबोळी, हाजी सय्यद वहाब, हाजी नजीर हुसेन, शफी जहागीरदार, सलाम खोकर, साहेबान जहागीरदार, नगरसेवक समद खान, आसिफ सुलतान, मुजाहिद कुरेशी, अजीम राजे, दिशान जहागीरदार, राजू जहागीरदार, शेख मुदस्सर अहमद, फिरोज सय्यद, अजहर शेख आदीसह मुस्लिम समाज बांधव मोठ्या संख्येने उपस्थित होते.
शहरात घडत असलेल्या घटनांमुळे शहरातील कायदा व सुव्यवस्था बिघडत आहे. बाहेरून येऊन काही मंडळी शहरातील जिल्ह्यातील तरुणांच्या माथी भडकविण्याचा प्रयत्न करीत आहे. कोठला जे.जे. गल्ली येथे दोन व्यक्तींमध्ये किरकोळ कारणावरून झालेल्या व्यक्तिगत भांडणांना जातीयवादी स्वरूप देण्यात आला. या घटनाचा संदर्भ घेऊन काही मंडळी सोशल मीडियावर सर्व मुस्लिम समाजाला टार्गेट करत आहे. राजरोस विविध मुलाखती, धमक्याद्वारे दोन समाजात तेढ निर्माण करण्याचा प्रयत्न करत असल्याचे स्पष्ट करण्यात आले आहे.
बाहेरून काही मंडळींना निमंत्रित करून मोर्चे, सभा, आंदोलने असे विविध माथी भडकविणारे कार्यक्रम घेऊन शहरातील वातावरण दूषित होत आहे. याचे गंभीर परिणाम काय होणार? हे प्रशासनाला माहित आहे. तरी याबाबत योग्यती दक्षता प्रशासनाने घेऊन शहरात शांतता अबाधित राहण्यासाठी प्रयत्न करणे आवश्यक असल्याचे निवेदनात म्हंटले आहे.
शहराची शांतता भंग करणार्‍यास कारणीभूत असलेल्या व त्याबाबत षडयंत्र करणार्‍या कोणत्याही समाजातील दोषींवर कठोर कारवाई करण्याची मागणी यावेळी करण्यात आली. तर काही दिवसांपूर्वी अहमदनगर बस स्थानक येथे पोलीस प्रशासनाच्या वतीने घेण्यात आलेल्या मॉकड्रिल मध्ये एका समाजाला टार्गेट करण्यात आले आहे. असे प्रकार किंवा एकतर्फी होणारी कारवाई टाळावी. जेणेकरून कुठल्याही समाजावर अन्याय होणार नसल्याचे मुस्लिम समाजाच्या वतीने सांगण्यात आले आहे.
पोलीस प्रशासनाने समाजातील प्रतिष्ठित नागरिक, सामाजिक, राजकीय कार्यकर्ते, नेते, व्यापारी वर्ग यांची शांतता समितीची संयुक्त बैठक घेऊन त्यांची मते जाणून घ्यावी. शहराचे वातावरण बिघडल्यास त्याचा सर्वसामान्य नागरिकांना फटका बसतो. यासाठी शहरातील शांतता व सुव्यवस्था भंग होणार नाही, यासाठी शहरातील वातावरण बिघडविण्याचा षडयंत्र करणार्‍यांवर कारवाई करण्याची मागणी मिस्लिम समाजाने केली आहे.