नगर तालुका महिला अध्यक्षपदी साबळे तर जामखेड तालुकाध्यक्षपदी मुरुमकर यांची नियुक्ती
संत, महात्म्यांच्या विचाराने वारकरी परिषदेचे कार्य -विजय भालसिंग
अहमदनगर (प्रतिनिधी)- अखिल विश्‍व वारकरी परिषद महाराष्ट्र राज्य संघटनेच्या नगर तालुका महिला अध्यक्षपदी ह.भ.प. प्रतिभा साबळे व जामखेड तालुकाध्यक्षपदी भिमराव मुरुमकर यांची नियुक्ती करण्यात आली.
जिल्हाध्यक्ष ह.भ.प. साहेबराव पाचारणे व जिल्हा कार्याध्यक्ष विजय भालसिंग यांनी सदर नियुक्ती जाहीर करुन साबळे व मुरुमकर यांना नियुक्तीपत्र देऊन त्यांचा सत्कार केला. माळीवाडा येथील महालक्ष्मी मंदिरात झालेल्या संघटनेच्या कार्यक्रमाप्रसंगी शहराध्यक्ष ह.भ.प. अ‍ॅड. सुनिल महाराज तोडकर, जिल्हा सचिव दिलीप महाराज साळवे, महालक्ष्मी मंदिर ट्रस्टचे अध्यक्ष बाबासाहेब साठे, अशोक साबळे, आशिष पारधे, उमेश साठे आदी उपस्थित होते.
ह.भ.प. प्रतिभा साबळे व भिमराव मुरुमकर यांचे धार्मिक कार्यासह त्यांचे सामाजिक कार्य सुरु आहे. धार्मिक कार्याला सामाजिक कार्याची जोड देऊन त्यांनी राबविलेल्या विविध उपक्रमाची दखल घेऊन त्यांची संघटनेच्या तालुकाध्यक्षपदी नियुक्ती करण्यात आली आहे.
जिल्हाध्यक्ष ह.भ.प. साहेबराव पाचारणे यांनी धार्मिक कार्याला सामाजिक उपक्रमाची जोड मिळत असल्याने समाजातील प्रश्‍न सुटण्यास मदत होत असल्याचे त्यांनी सांगितले. शहराध्यक्ष अ‍ॅड. सुनिल महाराज तोडकर यांनी संतांचे विचार व कार्य समाजात पोहचविण्यासाठी संघटना प्रयत्नशील असून, सुसंस्कारी समाज निर्मितीच्या उद्देशाने योगदान दिले जात असल्याचे त्यांनी सांगितले.
जिल्हा कार्याध्यक्ष विजय भालसिंग म्हणाले की, वारकरी संप्रदायाच्या माध्यमातून संत, महात्म्यांनी समाज घडविण्याचे कार्य केले. त्यांचे विचार समाजाला आजही मार्गदर्शक ठरत आहे. संत, महात्म्यांच्या विचाराने वारकरी परिषद समाजात कार्य करत आहे. दीन-दुबळ्यांना घटकांना आधार देण्याचा प्रयत्न सुरु असल्याचे त्यांनी सांगितले. जिल्हा सचिव दिलीप महाराज साळवे यांनी धार्मिक कार्याला सामाजिक कार्याची जोड मिळाल्यास बदल घडणार आहे. समाज परिवर्तनासाठी योगदान देणार्‍यांना संघटित करुन कार्य केले जात असल्याचे त्यांनी स्पष्ट केले. या निवडीबद्दल आखिल विश्‍व वारकरी परिषदचे प्रदेशाध्यक्ष नितीन सातपुते व इतर राज्य कार्यकारणी मंडळाच्या सदस्यांनी निवड झालेल्या नुतन पदाधिकार्‍यांचे अभिनंदन केले.