धार्मिक क्षेत्रासह सामाजिक क्षेत्रात काम करणार्‍यांना संघटनेत संधी
अहमदनगर (प्रतिनिधी)- अखिल विश्‍व वारकरी परिषद महाराष्ट्र राज्य संघटनेच्या जिल्हा सचिवपदी किर्तनकार दिलीप महाराज साळवे यांची तर शहराध्यक्षपदी ह.भ.प. अ‍ॅड. सुनिल महाराज तोडकर यांची नियुक्ती करण्यात आली.
जिल्हाध्यक्ष ह.भ.प. साहेबराव पाचारणे व जिल्हा कार्याध्यक्ष विजय भालसिंग यांनी सदर नियुक्ती जाहीर करुन साळवे व तोडकर यांना नियुक्तीपत्र देऊन त्यांचा सत्कार केला. यावेळी सामाजिक कार्यकर्ते सुनिल सकट, भिमराव मुरुमकर, अमोल खडके, गोकुळ धाडगे आदी उपस्थित होते.
दिलीप महाराज साळवे किर्तनकार असून, धार्मिक कार्यासह त्यांचे सामाजिक कार्य सुरु आहे. तर सुनिल महाराज तोडकर हे वकील असून ते देखील सामाजिक व धार्मिक क्षेत्रात योगदान देत आहेत. त्यांच्या या कार्याची दखल घेऊन त्यांची नियुक्ती करण्यात आली आहे. तसेच अ‍ॅड. तोडकर अहमदनगर बार असोसिएशनच्या खजिनदारपदी निवडून आल्याबद्दल त्यांचा संघटनेच्या वतीने सत्कार करण्यात आला.
जिल्हाध्यक्ष ह.भ.प. साहेबराव पाचारणे म्हणाले की, धार्मिक क्षेत्रात कार्यरत राहून सामाजिक क्षेत्रात निस्वार्थ भावनेने कार्य करणार्‍यांना संघटनेच्या माध्यमातून संधी दिली जात आहे. धार्मिक कार्याला सामाजिक कार्याची जोड मिळाल्यास बदल घडणार असल्याचे त्यांनी सांगितले.
जिल्हा कार्याध्यक्ष विजय भालसिंग म्हणाले की, धार्मिक कार्या पुरते मर्यादीत न राहता, सामाजिक कार्याची जोड देण्यासाठी संघटना प्रयत्नशील आहे. सर्वच घटकातील व्यक्तींना संघटनेशी जोडून सामाजिक कार्य उभे करुन समाजातील प्रश्‍न सोडविण्याचा मानस असल्याचे त्यांनी स्पष्ट केले.
संघटनेचे नवनिर्वाचित पदाधिकारी साळवे व तोडकर यांनी सत्काराला उत्तर देताना सामाजिक भावनेने योगदान देणार असल्याचे सांगितले. या निवडीबद्दल आखिल विश्‍व वारकरी परिषदचे प्रदेशाध्यक्ष नितीन सातपुते व इतर राज्य कार्यकारणी मंडळाच्या सदस्यांनी त्यांचे अभिनंदन केले.
