जिल्हा विधी सेवा प्राधिकरणचा उपक्रम
कायद्याप्रमाणे समाजात व विचारात स्त्री-पुरुष समानता येण्याची गरज -न्यायाधीश भाग्यश्री पाटील
अहमदनगर (प्रतिनिधी)- आजही समाज लिंग भेदात जोखडला गेला आहे. कायद्याने स्त्री-पुरुष समानता आली, मात्र समाजात व विचारात ही समानता येण्याची गरज आहे. स्वातंत्र्याचा अमृत महोत्सवी वर्ष साजरा करत असताना मुला-मुलीं मधील भेद दूर झाले का? हे देखील विचार व आत्मपरिक्षण करण्याची गरज असल्याचे प्रतिपादन जिल्हा विधी सेवा प्राधिकरणच्या सचिव तथा न्यायाधीश भाग्यश्री पाटील यांनी केले.
रयत शिक्षण संस्थेच्या कापड बाजार येथील लक्ष्मीबाई भाऊराव पाटील प्राथमिक व माध्यमिक विद्यालयात जिल्हा विधी सेवा प्राधिकरणच्या वतीने मुलींसह विद्यार्थ्यांमध्ये कायद्याची जागृती करुन राष्ट्रीय बालिका दिवस साजरा करण्यात आला.
या कार्यक्रमात मार्गदर्शन करताना न्यायाधीश पाटील बोलत होत्या. यावेळी बार असोसिएशनचे माजी अध्यक्ष भूषण बर्‍हाटे, मोहटा देवी देवस्थानचे विश्‍वस्त अ‍ॅड. विक्रम वाडेकर, बार असोसिएशनचे उपाध्यक्ष अ‍ॅड. राजाभाऊ शिर्के, माजी अध्यक्ष अ‍ॅड. गजेंद्र पिसाळ, अ‍ॅड. अनुराधा येवले, स्वप्निल परदेशी, माध्यमिकचे मुख्याध्यापक एस.एल. ठुबे, प्राथमिकचे मुख्याध्यापक शिवाजी लंके आदींसह शालेय विद्यार्थी मोठ्या संख्येने उपस्थित होते.
पुढे न्यायाधीश पाटील यांनी बालकांच्या हक्काचे संरक्षण करण्यासाठी पॉस्कोची माहिती देऊन कायदेविषयक जागृतीचे महत्त्व विशद केले. तर लहान चिमुकल्या मुला-मुलींना चांगला स्पर्श, वाईट स्पर्श याबद्दल माहिती दिली. तर अज्ञात व्यक्तीकडून वाईट स्पर्श झाल्यास त्वरीत पालक व शिक्षकांना सांगण्याचे त्यांनी मुलांना आवाहन केले.
मुख्याध्यापक एस.एल. ठुबे यांनी देशाच्या माजी महिला पंतप्रधान इंदिरा गांधी यांना नारी शक्तीच्या रुपात या दिवशी आठवण केली जाते. त्यांनी 24 जानेवारी रोजी देशाच्या प्रधानमंत्री पदाची धूरा सांभाळली होती. त्यांच्या स्मृतीप्रित्यर्थ राष्ट्रीय बालिका दिवस साजरा केला जात असल्याची माहिती दिली.
शाळेत झालेल्या गणित, विज्ञान प्रदर्शन व इतर स्पर्धेतील विजेत्या आणि गुणवंत विद्यार्थ्यांना पाहुण्यांच्या हस्ते बक्षिसे देण्यात आली. कार्यक्रमाचे सूत्रसंचालन प्रदीप पालवे यांनी केले. पाहुण्यांचे स्वागत शिवाजी लंके यांनी केले. आभार ठुबे यांनी मानले. कार्यक्रम यशस्वी करण्यासाठी शालेय शिक्षक व शिक्षकेतर कर्मचार्‍यांनी परिश्रम घेतले.