नगरची महिला राष्ट्रीय पॉवरलिफ्टिंग स्पर्धेत करणार महाराष्ट्राचे प्रतिनिधित्व
अहमदनगर (प्रतिनिधी)- मधुकर दरेकर मेमोरियल स्टेट पॉवरलिफ्टिंग स्पर्धेत शहरातील सौ. अनुराधा मिश्रा यांनी कास्य पदक पटकाविले. त्यांची नॅशनल स्पर्धेसाठी निवड झाली असून, महिलांच्या संघात त्या महाराष्ट्राचे प्रतिनिधित्व करणार आहेत.
परेल, मुंबई येथे अनएक्विप ज्युनियर, सीनियर व मास्टर्स गटात महिला, पुरुषांसाठी सदरची पॉवर लिफ्टिंग स्पर्धा उत्साहात पार पडली. यामध्ये राज्यातील मोठ्या संख्येने खेळाडू सहभागी झाले होते. अ‍ॅमेचर पॉवर लिफ्टिंग असोसिएशनच्या वतीने या स्पर्धेचे आयोजन करण्यात आले होते.
अनुराधा मिश्रा यांनी उत्कृष्ट प्रदर्शन करुन 57 किलो वजन गटात 190 किलो वजन उचलले. मास्टर वन कॅटेगिरी मध्ये त्यांना कास्य पदक मिळाला आहे. सप्टेंबर मध्ये झारखंड, जमशेदपूर येथे होणार्‍या नॅशनल स्पर्धेसाठी त्यांची निवड झाली आहे. त्या जिम स्ट्राईकर मध्ये प्रशिक्षक स्वप्निल मंडलिक यांच्या मार्गदर्शनाखाली सराव करत आहे. या यशाबद्दल त्यांचे सर्वत्र अभिनंदन होत आहे.