त्या युवतीच्या अपघाताला कारणीभूत असलेल्यांवर सदोष मनुष्यवधाचा गुन्हे दाखल व्हावे
आम आदमी पार्टीचे आयुक्तांना निवेदन
अहमदनगर (प्रतिनिधी)- अपघाताला कारणीभूत असलेल्या प्रेमदान चौकातील अतिक्रमण काढून वळण रस्ता खुला करण्याची मागणी आम आदमी पार्टीच्या वतीने मनपा आयुक्त डॉ. पंकज जावळे यांच्याकडे निवेदनाद्वारे करण्यात आली. तर नुकतेच झालेल्या अपघातात एका मुलीचा जीव गेला असताना अपघाताला कारणीभूत असलेल्यांवर सदोष मनुष्यवधाचा गुन्हा दाखल करावा व अतिक्रमण करणार्‍यांवर कायदेशीर कारवाई करण्याची मागणी करण्यात आली.
आम आदमी पार्टीच्या शिष्टमंडळाने सदर अतिक्रमण हटविण्याबाबत आयुक्तांशी सविस्तर चर्चा केली. यावेळी शहराध्यक्ष राजेंद्र कर्डिले, कार्याध्यक्ष भरत खाकाळ, रवी सातपुते, संपत मोरे, दिलीप घुले, गणेश मारवाडे, विक्रम क्षीरसागर, आकाश बरबडे, मनोज सुळ, सुधीर कुलकर्णी आदींसह पदाधिकारी व कार्यकर्ते उपस्थित होते.
9 जानेवारी रोजी प्रेमदान चौकात एमएमटी बसने त्याच बस मधून उतरलेल्या रवीना सुद्रिक या मुलीला पाठीमागून धडक दिल्याने तिचा उपचारादरम्यान मृत्यू झाला आहे. हा अपघात रस्त्याच्या दोन्ही बाजूने असलेल्या अतिक्रमणामुळे झाला आहे. तर यामध्ये बस चालकाची अक्षम्य चूक आहे. बसमधून उतरलेल्या मुलीचे पाठीमागून धडक दिल्याची घटना जवळच्या सीसीटीव्ही कॅमेरामध्ये कैद झाले असल्याचे मुलीच्या वडिलांनी देखील स्पष्ट केले आहे.
ही घटना घडल्यानंतर दवाखान्यात उपचारासाठी भरती केलेल्या मुलीने घडलेला प्रकार वडिलांना सांगितला. बेजबाबदार बस चालक, रस्त्याच्या कडेला असलेले अतिक्रमण व मनपाचे अतिक्रमण विभाग मुलीच्या अपघाताला कारणीभूत ठरले असल्याचे निवेदनात म्हंटले आहे.
अपघाताला कारणीभूत असलेल्यांकडून मुलीची नुकसान भरपाई घेऊन तिच्या कुटुंबीयांना न्याय द्यावा, प्रेमदान चौकातील अतिक्रमण काढून वळण रस्ता खुला करण्याची मागणी आम आदमी पार्टीच्या वतीने करण्यात आली आहे.