उन्नती सेवाभावी संस्थेचा सामाजिक उपक्रम
शिक्षण हे सामाजिक परिवर्तनाचे माध्यम -डोड
अहमदनगर (प्रतिनिधी)- उन्नती सेवाभावी संस्थेच्या वतीने भिंगार, आलमगीर, मेहकरी व नागरदेवळे येथील दोनशे गरजू विद्यार्थ्यांना शालेय बॅगचे वाटप करण्यात आले. या सामाजिक उपक्रमास जर्मन येथील आय.एन.के.आय. फोर हेल्प इ.व्ही. या सामाजिक संस्थेचे सहकार्य लाभले.
उन्नती सेवाभावी संस्थेच्या आलमगीर रोड येथील वाचनालयाच्या प्रांगणात झालेल्या शैक्षणिक साहित्य वाटप कार्यक्रमासाठी प्रमुख पाहुणे म्हणून आय.एन.के.आय. फोर हेल्प संस्थेचे श्रीमती डोड, संजय आढाव, अमित महाराज धाडगे, लोकेश मेहतानी, रमेश कडूस, सीए समाधान गिते, उन्नतीचे संचालक गजानन भंडारे, अच्युत चिणके, सर्वेश केदारे, सिमा केदारे, संगिता वरुडे, वर्षा वाघावकर, शिवम भंडारी, अनिल सोळसे, ज्ञानेश्वर डिगे, पराग खुपशे, रेश्मा खुपशे, अरविंद्र ब्राम्हणे आदी उपस्थित होते.
प्रास्ताविकात पराग खुपशे यांनी उन्नती सेवाभावी संस्थेच्या सामाजिक कार्याचा आढावा घेऊन, गरजू घटकांना सातत्याने करण्यात येणारी मदत व कोरोना काळात गरजूंना आधार देण्यासाठी राबविलेल्या उपक्रमाची माहिती दिली. पाहुण्यांचा परिचय ज्ञानेश्वर फासे यांनी करुन दिला. पाहुण्यांचे स्वागत उन्नतीचे कार्याध्यक्ष गणेश उपरे यांनी केले.
श्रीमती डोड म्हणाल्या की, सर्वसामान्य घटकांतील विद्यार्थ्यांना आधार दिल्यास त्यांची परिस्थिती सुधारणार आहे. शिक्षण हे सामाजिक परिवर्तनाचे माध्यम असून, समाजाच्या विकासासाठी गरजू घटकांना शिक्षणासाठी मदतीचा हात देण्याची गरज असून, आय.एन.के.आय. फोर हेल्प इ.व्ही. या संस्थेच्या माध्यमातून मदत दिली जात असल्याचे त्यांनी स्पष्ट केले. समाधान गिते व अनिल महाराज धाडगे यांनी विद्यार्थ्यांना परिस्थितीवर मात करण्यासाठी उच्च शिक्षण घेण्याचे आवाहन करुन प्रेरणादायी मार्गदर्शन केले.
या कार्यक्रमात उपस्थित पाहुण्यांच्या हस्ते नागरदेवळे येथील जानकी कवडे प्रशाला, भिंगार कॅन्टोमेंट शाळा, सावता माळी जिल्हा परिषद शाळा, मेहकरी, सरदार वल्लभभाई शाळा या शाळेतील विद्यार्थ्यांना शालेय बॅगचे वाटप करण्यात आले. कार्यक्रमाचे सूत्रसंचालन अॅड. राजाभाऊ शिर्के यांनी केले. आभार शिक्षिका उज्वला घावटे यांनी मानले.
