पदाला चिटकून राहिलेल्या माजी अध्यक्षाचा संभ्रम निर्माण करण्याचा केविलवाणा प्रयत्न
संघटनेची दुसरी बोलविण्यात आलेली बैठक घटनाबाह्य असल्याचा आरोप
अहमदनगर (प्रतिनिधी)- अहमदनगर जिल्हा माध्यमिक शिक्षक संघटनेची बैठक घटनेप्रमाणे होवून कार्यकारणी निवड करण्यात आली आहे. साडे पाच वर्षे पदाला चिटकून राहिलेल्यांनी पदवीधर मतदारसंघाची निवडणुक डोळ्यासमोर ठेवून पद न सोडण्याचा व संभ्रम निर्माण करण्याचा केविलवाणा प्रयत्न सुरु असल्याचा टोला नवनिर्वाचित माध्यमिक शिक्षक संघटनेचे अध्यक्ष आप्पासाहेब शिंदे यांनी माजी अध्यक्ष राजेंद्र लांडे यांना लगावला आहे.
आप्पासाहेब शिंदे यांनी प्रसिध्दीस दिलेल्या पत्रकात पदाला चिटकून बसलेल्या माजी अध्यक्षांनी शिक्षक संघटनेच्या घटनेबाबत बोलू नये, असे स्पष्ट केले आहे. तर संघटनेची दुसरी बोलविण्यात आलेली बैठक घटनाबाह्य असून, या सभेला सभासदांनी हजर न राहण्याचे आवाहन त्यांनी केले आहे.
अहमदनगर जिल्हा माध्यमिक शिक्षक संघटनेची निवड घटनेप्रमाणे दर दोन वर्षांनी घेण्यात येते. संघटनेचे माजी अध्यक्ष राजेंद्र लांडे यांना निवृत्त होऊन दोन वर्ष पाच महिने झाले आहे. त्यांचा अध्यक्षपदाचा कार्यकाळ एकूण साडेपाच वर्षाचा झाला असला तरी देखील त्यांना पद सोडावेसे वाटत नसल्याचे शिंदे यांनी म्हंटले आहे.
सर्व जिल्हा कार्यकारिणीने तसेच तालुका अध्यक्ष व सचिव यांनी वेळोवेळी कार्यकारणी निवडी संदर्भात सूचना केल्या. त्यानंतर सर्वांची 18 सप्टेंबर रोजी सर्वसाधारण सभा घेण्याचे ठरले होते. परंतु त्या दिवशी रयत बँकेची सर्वसाधारण सभा असल्यामुळे सर्वसाधारण सभा 11 डिसेंबर रोजी घेण्यात आली. बहुसंख्येने उपस्थित असलेल्या या सभेत जिल्हा कार्यकारणी निवडण्यात आली आहे.
परंतु असंतुष्ट लोकांनी तसेच माजी अध्यक्ष यांनी तीनच पदाधिकार्‍यांची नावे असलेल्या संघटनेच्या लेटरहेडवर बेकायदेशीरपणे सर्वसाधारण सभेचा अजेंडा पाठविलेला आहे. बोलविण्यात आलेली सभा पूर्णपणे घटनाबाह्य आहे. पदाच्या लालसेपोटी हा खटाटोप सुरु असल्याचे शिंदे यांनी स्पष्ट केले आहे.
शिक्षकांच्या जुन्या पेन्शन बाबत कळवळा दाखविणारे अध्यक्ष यांनी जुन्या पेन्शनसाठी नागपूर व मुंबई येथील आंदोलनस्थळी फिरकले देखील नाही.
नगरमध्ये जुन्या पेन्शनसाठी झालेल्या मेळाव्यात देखील त्यांचा सहभाग नव्हता. शिक्षकांवर अनेक ठिकणी हल्ले झाले प्रत्येक ठिकाणी आंम्ही पोहोचलो. अशा प्रकारे संघटनेचे काम आम्ही करत असल्याचा खुलासा आप्पासाहेब शिंदे यांनी केला आहे. इथून पुढे देखील नवीन झालेली जिल्हा कार्यकारणी तसेच सर्व तालुका कार्यकारणीला बरोबर घेऊन शिक्षकांच्या प्रश्‍नावर व शिक्षक हितासाठी संघटनेद्वारे काम केले जाणार असल्याचे त्यांनी सांगितले आहे.
