वक्तृत्व स्पर्धेत काय असाव? यापेक्षा काय नसाव हे महत्त्वाचे -अॅड. शिवाजी कराळे
अहमदनगर (प्रतिनिधी)- संविधान दिनानिमित्त सीडी देशमुख लॉ कॉलेज मध्ये वक्तृत्व स्पर्धा उत्साहात पार पडली. स्व. अनुराधाताई लक्ष्मणराव ढोबळे यांच्या जयंतीनिमित्त या वक्तृत्व स्पर्धेचे आयोजन करण्यात आले होते. या वक्तृत्व स्पर्धेतून विद्यार्थ्यांनी संविधानाचा जागर केला.
कौटुंबिक न्यायालय बार असोसिएशनचे अध्यक्ष अॅड. शिवाजी कराळे, प्राचार्य आर.आर. बेग, संस्थेचे लोकल सेक्रेटरी प्रा. ना. म. साठे यांच्या प्रमुख उपस्थितीमध्ये या स्पर्धेचे उद्घाटन झाले. यावेळी संविधान प्रास्ताविकेचे सामुदायिक वाचन करण्यात आले. प्रास्ताविकात प्राचार्य आर.आर. बेग यांनी करुन विद्यार्थ्यांच्या अंगी वक्तृत्व कौशल्य विकसीत करण्यासाठी या स्पर्धेचे आयोजन केले गेले असल्याचे स्पष्ट केले.
अॅड. शिवाजी कराळे म्हणाले की, संविधानाप्रमाणे आपण मार्गक्रमण केल्यास आपला देश निश्चित बलशाली होणार आहे. संविधानाने दिलेले अधिकार सांगताना जबाबदारी ही प्रत्येकाने अंगीकारण्याचे त्यांनी आवाहन केले. उत्तम वकील होण्यासाठी वक्तृत्व कौशल्य असणे आवश्यक असल्याचे सांगून, त्यांनी वक्तृत्व स्पर्धेत काय असाव? यापेक्षा काय नसाव याबद्दल देखील विद्यार्थ्यांना मार्गदर्शन केले.
या वक्तृत्व स्पर्धेत प्रथम क्रमांक- शितल महादेव वाघमारे, द्वितीय क्रमांक-अमोल राठोड व तृतीय क्रमांक- आदित्य कोळी यांनी पटकाविले. या विजेत्या स्पर्धकांना पाहुण्यांच्या हस्ते बक्षिस स्वरुपात रोख रक्कम, स्मृतीचिन्ह व प्रमाणपत्र देऊन गौरविण्यात आले. कार्यक्रमाचे सूत्रसंचालन प्रसाद पाटसकर यांनी केले. कार्यक्रम यशस्वी करण्यासाठी प्राध्यापिका मीरा जानराव, प्राध्यापक सचिन तरटे, जबीन शेख, सविता तांबे, विशाल राठोड, विनोद चव्हाण, सतीश थोरात, निना शिंदे यांनी परिश्रम घेतले.
