अवैध धंदे व जुगारवर कारवाई करण्याची मागणी
अहमदनगर (प्रतिनिधी)- एमआयडीसी हद्दीत मोठ्या प्रमाणात फोफावलेले अवैध धंदे, जुगार व अवैध दारू विक्रीवर कारवाई करण्याची मागणी भाजप अनुसूचित जाती महिला मोर्चाच्या शहर जिल्हा उपाध्यक्ष शारदा गायकवाड व अंतोन गायकवाड या दांपत्यांनी केली आहे. तर या भागातील तब्बल 20 अवैध धंदे वाल्यांचा लेखाजोखा नाव, पत्त्यासह पोलीस अधीक्षकांना देऊन पोलीस प्रशासनाला कारवाईचे एकप्रकारे आवाहन दिले आहे.
तर एमआयडीसी पोलीस स्टेशनचे पोलीस निरीक्षक हप्ते गोळा करत असल्याने या अवैध धंद्यांना अभय दिला जात असल्याचा आरोप गायकवाड यांनी केला आहे. याबाबतही चौकशी करुन संबंधित पोलीस अधिकारीवर कारवाई करण्याची मागणीही त्यांनी केली आहे. याप्रकरणी कारवाई न झाल्यास 6 फेब्रुवारी पासून जिल्हा पोलीस अधीक्षक कार्यालया समोर कुटुंबियांसह अमर उपोषण करण्याचा इशारा त्यांनी दिला आहे.
नागापूर, एमआयडीसी, नवनागापूर परिसरात मोठ्या प्रमाणात मटका, दारू, बिंगो, सोरट जुगार, अवैध धंदे, दारू विक्री खुलेआम सुरू आहे. के.के. रेंज भागात अवैध वाळू तस्करी खुलेआम सुरु आहे. मात्र स्थानिक पोलीस अधिकारी या अवैध धंद्यावाल्यांकडून हप्ते घेऊन त्यांना अभय देत आहे.
यामुळे कुठल्याही प्रकारची कारवाई त्यांच्यावर होत नसल्याचे निवेदनात म्हंटले आहे. या अवैध धंद्यामुळे गोरगरीब लोकांचे संसार उध्वस्त होत आहे. तरुण मुले व्यसनाच्या आहारी जात आहे. पुरुष व्यसनी व जुगारी झाल्याने त्यांच्या कुटुंबीयांवर उपसमारीची वेळ आली असल्याचे स्पष्ट करण्यात आले आहे. तर हा तक्रार अर्ज दिल्याने जीवाला देखील धोका निर्माण झाला असल्याचे गायकवाड यांनी म्हंटले आहे.