हिंदुस्तान जिंदाबाद! च्या घोषणांनी मदरसा दणाणला
वृक्षरोपणाने पर्यावरण संवर्धणाचा संदेश
अहमदनगर (प्रतिनिधी)- शहरालगत असलेल्या बाराबाभळी (ता. नगर) येथील जामिया मोहम्मदिया मदरसेत मोठ्या उत्साहात प्रजासत्ताक दिन साजरा करण्यात आला. मदरसेमध्ये तिरंगा ध्वज फडकवून पर्यावरण संवर्धणाचा संदेश देत वृक्षरोपण करण्यात आले. विद्यार्थ्यांनी मदरसा परिसर हिरावाईने फुलविण्याचा संकल्प व्यक्त केला. तर मदरसामधील खेळाडूंनी यावेळी कराटे व तायक्वांदोच्या विविध धाडसी चित्त थरारक प्रात्यक्षिके सादर करुन उपस्थितांच्या ह्रद्याचा ठोका चुकवला.
प्रारंभी भिंगार कॅम्प पोलीस स्टेशनचे सहाय्यक पोलीस निरीक्षक शिशिरकुमार देशमुख यांच्या हस्ते ध्वजारोहण करण्यात आले. यावेळी माजी जिल्हा परिषद सदस्य राहुल पानसरे, अब्दुस सलाम, हाजी मन्सूरभाई शेख, हाजी शौकत तांबोली, मदरसेचे प्राचार्य कारी अब्दुल कादिर, मदरसेचे विश्‍वस्त मतीन सय्यद, ग्रामपंचायत सदस्य शंकर कवडे, आयटीआय महाविद्यालयाचे प्राचार्य नदीम शेख, इंजि. तौसिफ शेख, अमीर सय्यद, लाला पटेल, क्रीडा शिक्षक वसीम शेख, अन्वर शेख आदींसह मदरसामधील शिक्षक व विद्यार्थी मोठ्या संख्येने उपस्थित होते.
या कार्यक्रमात हिंदुस्तान जिंदाबाद!…., सारे जहाँ से अच्छा हिंदुस्तान हमारा!… या घोषणांनी मदरसाचा परिसर दणाणून निघाला. मदरसातील विद्यार्थी हातात तिरंगे ध्वज घेऊन कार्यक्रमात सहभागी झाले होते. विद्यार्थ्यांनी आपल्या भाषणातून सशक्त भारताचे दर्शन घडविले.
सहाय्यक पोलीस निरीक्षक शिशिरकुमार देशमुख यांनी विद्यार्थ्यांनी आपल्या मधील कलागुण व कौशल्य ओळखून भविष्याची वाटचाल करावी. मदरसातील मुले होतकरु, हुशार असून शिक्षण व क्रीडा क्षेत्रात देखील पुढे येत आहे. त्यांनी आपल्या गुणवत्तेने पोलीस भरती व लष्करात दाखल होऊन देशसेवा करण्याचे त्यांनी आवाहन केले.
प्रास्ताविकात प्राचार्य अब्दुल कादिर यांनी विद्यार्थ्यांना धार्मिक शिक्षणाबरोबर स्पर्धामय युगाच्या दृष्टीकोनाने शालेय शिक्षणासह कौशल्यपूर्ण व्यावसायिक प्रशिक्षण देखील दिले जात आहे. विद्यार्थ्यांमधील विविध कौशल्य गुणांचा विकास साधण्यासाठी विविध उपक्रम राबविण्यात येत असल्याची त्यांनी माहिती दिली. पाहुण्यांचे स्वागत हाजी मन्सूर शेख यांनी केले.
हाजी शौकत तांबोळी म्हणाले की, लोकशाही टिकविण्यासाठी निवडणुकांमध्ये मतदानाचा हक्क बजाविणे आवश्यक आहे. घटनेने नागरिकांना मिळालेला हा सर्वात मोठा अधिकार आहे. मतदानाचा हक्क न बजावल्यास पुन्हा गुलामगिरीत जाण्याची वेळ येऊ नये, असे सांगून त्यांनी लोकशाहीच्या प्रगल्भतेसाठी मतदानाचे महत्त्व व देशाच्या स्वातंत्र्यासाठी मुस्लिम समाजाने दिलेल्या योगदान विशद केले.
अब्दुस सलाम यांनी भारताच्या सर्वांगीण विकासासाठी व सक्षमतेसाठी सर्वांनी एकजुटीने पुढे जाण्याचे गरज असल्याचे सांगितले. राहुल पानसरे यांनी मदरसामधील मुलांना प्रजासत्ताक दिनाच्या शुभेच्छा दिल्या.
प्रजासत्ताक दिनानिमित्त आयोजित केलेल्या क्रिकेट स्पर्धेचे उद्घाटन मदरसेचे विश्‍वस्त मतीन सय्यद यांच्या हस्ते करण्यात आले. कार्यक्रमाचे सूत्रसंचालन अन्सार शहा यांनी केले.