अ‍ॅड. गजेंद्र दांगट यांचे उच्चशिक्षण संचनालयाच्या (पुणे) संचालकांना निवेदन
महाविद्यालय प्रशासन अप्रत्यक्षपणे सामाजिक व धार्मिक तेढ निर्माण करत असल्याचा आरोप
अहमदनगर (प्रतिनिधी)- अहमदनगर महाविद्यालयात शिवजयंतीला विरोध करून अप्रत्यक्षपणे सामाजिक व धार्मिक तेढ निर्माण केल्याप्रकरणी त्या घटनेच्या चौकशीसाठी उच्चस्तरीय समिती नेमून सदर महाविद्यालयावर कारवाई करावी व शिवजयंती साजरी करण्याचा आदेश देण्याची मागणी अ‍ॅड. गजेंद्र दांगट यांनी उच्चशिक्षण संचनालयाचे (पुणे) संचालकांकडे निवेदनाद्वारे केली आहे.
अहमदनगर महाविद्यालयात शिवजयंती साजरी करता यावी, यासाठी प्राचार्य यांची परवानगी घेण्यासाठी त्यांच्या कार्यालयात चाललेल्या काही तरुणांना गुरुवारी (19 जानेवारी) 20 ते 30 जणांच्या जमावाने या महाविद्यालयात शिवजयंती साजरी करायची नाही म्हणत मारहाण केली. याबाबत कोतवाली पोलिस स्टेशनला गुन्हा दाखल झाला आहे.
या मारहाणीच्या प्रकाराला कॉलेज व्यवस्थापन व प्राध्यापक प्रत्यक्ष आणि अप्रत्यक्ष जबाबदार आहेत. सामाजिक सलोख राखण्यात कॉलेज प्रशासन पूर्णपणे अपयशी ठरलेले आहे. येथील व्यवस्थापन कायम धार्मिक द्वेषाला खतपाणी घालत आहे. या कॉलेजची वाटचाल चुकीच्या विचारसरणीतून सुरु असल्याने महाविद्यालयातील तरुण विद्यार्थी धर्मांध होत असल्याचा आरोप निवेदनाद्वारे करण्यात आला आहे.
या महाविद्यालयामुळे शहरासह जिल्ह्यातील वातावरण दुषित झाले आहे. त्यांच्या या कृतीमुळे तरुण पिढी दंगलीत अडकण्याची शक्यता निर्माण झाली आहे. या महाविद्यालयाला सुशिक्षित तरुण पिढी ऐवजी गुंड घडवायचे आहेत का? हा प्रश्‍न उपस्थित करण्यात आला आहे.
हे महाविद्यालय शासनाच्या अनुदानावर म्हणजे जनतेच्या पैशांवर सुरु असल्याने छत्रपती शिवाजी महाराजांची जयंती या महाविद्यालयात साजरी करण्याचा आदेश देण्याची मागणी अ‍ॅड. दांगट यांनी उच्चशिक्षण संचनालयाचे (पुणे) संचालकांकडे केली आहे. या मागणीचे निवेदन नुकतेच पोस्ट व ईमेलद्वारे पाठविण्यात आले आहे.