शाळेचा शिपाई हयात असल्यापासून ते मयत झाल्यानंतरही अनेक वर्षे लाटला पगार
समाज कल्याण विभागातील अधिकारीचा देखील गुन्ह्यात समावेश
अहमदनगर (प्रतिनिधी)- शैक्षणिक संस्थेत मयत झालेल्या शिपाईच्या नावावर खोटे तपासणी अहवाल शासनाला सादर करुन मयताच्या नावाने पगार काढल्याप्रकरणी व सदर मयत शिपाईला कायम स्वरुपी नोकरी लावण्याचे अमिष दाखवून दोन लाख रुपये घेतल्या प्रकरणी सद्गुरु रोहिदासजी बहुउद्देशीय ग्रामीण विकास प्रतिष्ठान अहमदनगर या संस्थेचे संस्थापक अध्यक्ष सुभाष बन्सी साळवे, खजिनदार अनिता सुभाष साळवे, अनुराग सुभाष साळवे, संजय बन्सी साळवे, रेखा संजय साळवे (रा. आलमगीर रोड), अनिल तुळशीराम शिंदे, मंगल अनिल शिंदे (रा. अहमदनगर), राजू बन्सी साळवे, राजू बरकत पटेल, विजयकुमार पोपटराव पोटे (रा. पाथर्डी) यांच्यावर इतर संचालकांवर बनावट कागदपत्रे तयार करुन फसवणुक केल्याप्रकरणी पाथर्डी पोलीस स्टेशनला मंगळवारी (दि.11 ऑक्टोबर) भा.द.वि. कलम 406, 420, 465, 468, 471, 34 अन्वये 11 व्यक्तींवर मयत व्यक्तीची पत्नी शोभा अनिल कांबळे (रा. राहुरी) यांच्या फिर्यादीवरुन गुन्हा दाखल करण्यात आला आहे. यामध्ये समाज कल्याण विभागातील अधिकारीचा देखील समावेश असून, मयत व्यक्ती हयात असताना 2011 पासून ते 2018 ला मयत झाल्यानंतर देखील अद्याप पर्यंत फसवणुक करण्यात आलेली आहे.
शोभा अनिल कांबळे यांचे पती अनिल शंकरराव कांबळे हे 19 ऑक्टोंबर 2018 रोजी मयत झालेले आहे. पती हयात असताना सद्गुरु रोहिदासजी बहुउद्देशीय ग्रामीण विकास प्रतिष्ठान अहमदनगर या संस्थेच्या सद्गुरु रोहिदासजी अनुसूचित जाती केंद्रीय प्राथमिक आश्रम शाळा खांडगाव (ता. पाथर्डी) या आश्रम शाळेवर सन 2011 पासून शिपाई या पदावर नियुक्त होते. ते आश्रम शाळेवर हजर झाल्यापासून मयत होईपर्यंत कार्यरत राहिले. त्या मोबदल्यात त्यांना कोणत्याही प्रकारे मानधन अथवा वेतन देण्यात आले नाही. या संस्थेत शिपाई पदावर कायम स्वरुपी नोकरी लावतो म्हणून संस्थेचे संस्थापक व खजिनदार यांनी 2014-15 साली अनिल कांबळे यांच्याकडून दोन लाख रुपये घेतले होते. पती हयात असताना दिलेले पैसे परत मागितल्याने आज-उद्या देण्याचे बहाणे दाखवून उडवा उडवीची उत्तरे देण्यात आली. त्यानंतर पतीचे सन 2018 मध्ये आजारपणाने मयत झाले. पैसे घेऊनही त्यांना शेवटपर्यंत कायमस्वरूपी नियुक्ती बाबतचे आदेश देण्यात आले नाही.
इतर कर्मचार्‍यांनी माहिती अधिकारांमध्ये 2013 ते 2022 अखेर माहिती मागितली असता, प्राप्त माहितीमध्ये संस्थेचे तत्कालीन विद्यमान संचालक मंडळाने केंद्र शासनाचे कोट्यावधीचे अनुदान मिळवले असल्याचे उघड झाले. पती हयात असताना व मयत झाल्यानंतर त्यांचे कामाचा एकही पगार त्यांना अथवा मला दिलेला नाही. कायमस्वरुपी नोकरीसाठी दिलेले दोन लाख रुपये देखील परत मिळालेले नाही. संस्थेचे अध्यक्ष, खजिनदार, सर्व संचालक मंडळ यांनी तत्कालीन सहाय्यक आयुक्त, विद्यमान सहाय्यक आयुक्त समाज कल्याण तसेच अहमदनगर समाज कल्याण निरीक्षक यांना हाताशी धरून खोटा तपासणी अहवाल शासनाला सादर करून कर्मचार्‍यांचे तसेच माझे पतीच्या नावावर पगार व आश्रम शाळेचा इतर खर्च दाखवून बनावट कागदपत्र तयार केली. शासनाने अनुदानित केलेल्या रकमेचा वापर करून माझे पती, माझी व इतर कर्मचारी यांची फसवणूक केल्याचे फिर्यादीत शोभा अनिल कांबळे यांनी म्हंटले आहे.
