नामांतराचा घाट सत्ता टिकवण्यासाठी व जनतेमध्ये धर्माची गुंगी टिकून ठेवण्याचा भाग असल्याचा आरोप
अहमदनगर (प्रतिनिधी)- अहमदनगर शहराच्या नामांतर करण्याचा घाट सत्ता टिकवण्यासाठी व जनतेमध्ये धर्माची गुंगी टिकून ठेवण्याचा भाग असल्याचा आरोप करुन, अहमदनगरच्या नामांतराला पीपल्स हेल्पलाईन व भारतीय जनसंसदेच्या वतीने विरोध दर्शविण्यात आला आहे.
लोककल्याणपेक्षा स्वकल्याण करण्यासाठी आणि सत्ता मिळवून टिकवण्यासाठी महाराष्ट्रासह देशभर शहरांचे नामांतर करण्याचा धडाका सुरू आहे. उन्नत चेतनेचा अभावाने धर्म आणि जातीच्या मानसशास्त्रीय अ‍ॅपचा वापर करून आणि जनतेमध्ये धर्माची गुंगी टिकून ठेवण्याचा भाग म्हणून अशा नामांतरांच्या घोषणा केल्या जात आहे. त्याचाच भाग म्हणून अहमदनगरचे नामांतर करण्याचा घाट सत्ताधारी मंडळींनी धरला असल्याचे संघटनेच्या वतीने स्पष्ट करण्यात आले आहे.
अहमदनगर शहरासह जिल्ह्यात सातत्याने टिकून असलेले रस्त्यावरील खड्डे आणि सर्व नागरी सुविधांपासून वंचित असलेल्या अहमदनगरसाठी माजी पालकमंत्री यांनी काही केले नाही. परंतु जातीच्या नावावर मत मिळवण्याच्या घाट घालून सत्तेचा वापर नामांतर करण्यासाठी केला जात आहे. विशेष बाब म्हणजे अहमदनगर शहराला पाचशेपेक्षा जास्त वर्षाचा इतिहास जोडला गेला आहे. नामांतर करुन शालेय विद्यार्थ्यांना चुकीचा इतिहास शिकवण्याचा घाट उन्नतचेतनाहीन सत्ताधार्‍यांचा आहे.
अहमदनगर शेजारी पुण्यश्‍लोक अहिल्यादेवी यांच्या नावाने नवीन शहर उभारण्याऐवजी सरकारच्या तिजोरी एक रुपयाचा देखील बोजा न पाडता, या नामांतरातून जनतेच्या डोळ्यात धूळ फेकण्याचा प्रयत्न सुरू आहे. सध्याचे शिक्षण मंत्री यांना पुन्हा एकदा चौथीच्या वर्गात बसवून उन्नत चेतनाचे धडे घ्यावे लागणार असल्याचे प्रसिध्दी पत्रकात म्हंटले आहे.
शहरामध्ये पंतप्रधान आवास योजनेअंतर्गत एक घरकुल देखील वंचितांसाठी केंद्र आणि राज्य सरकारला बांधता आले नाही. अशा वेळेस अहमदनगरचे नामांतर करण्याचा घाट म्हणजे छत्रपती शिवाजी महाराजांचे नाव तोंडात ठेवून, फक्त अफजलखानासारखे वागण्याचा प्रकार आहे. स्वातंत्र्याच्या 75 वर्षात भारतात जात आणि धर्म मानसशास्त्रीय अ‍ॅपच्या माध्यमातून धर्मवेड्या आणि जातवेड्या लोकांमध्ये अफूची गुंगी पसरवली जात आहे. जाती, धर्माच्या नावावर मागच्या दाराने सत्ता मिळविण्याचे षडयंत्र रचले जात असल्याचे अ‍ॅड. कारभारी गवळी यांनी म्हंटले आहे.
धर्माच्या आणि जातीच्या नावावर राजकारण करणार्‍या लोकांविरुद्ध जय शिवाजी, जय डिच्चू कावा तंत्र वापरण्याचे आवाहन संघटनेने केले आहे. तर शहर नामांतरला संघटनेचे पदाधिकारी अ‍ॅड. गवळी, अशोक सब्बन, अर्शद शेख, डॉ. महेबुब सय्यद, प्रकाश थोरात, सुधीर भद्रे, ज्ञानदेव काळे यांनी देखील विरोध दर्शविला आहे.