स्मारक व वर्गवारी आरक्षणासाठी विधानसभेच्या हिवाळी अधिवेशनावर मोर्चा
लहुजींचा इतिहास खर्‍या अर्थाने जगापुढे मांडण्याची गरज -सुनील शिंदे
अहमदनगर (प्रतिनिधी)- क्रांतिवीर लहुजी वस्ताद साळवे यांच्या जयंतीनिमित्त त्यांच्या पुतळ्यास लहुजी शक्ती सेनेच्या वतीने सिध्दार्थनगर येथील त्यांच्या पुतळ्यास पुष्पहार अर्पण करुन अभिवादन करण्यात आले. तर क्रांतिगुरू लहुजी वस्ताद साळवे यांचे स्मारक संगमवाडी येथे उभारण्यासाठी व अनुसूचित जातीमध्ये अ,ब,क,ड आरक्षणाची वर्गवारी करण्याच्या प्रमख मागणीसाठी विधानसभेच्या हिवाळी अधिवेशनावर मोर्चा घेऊन धडकणार असल्याचा इशारा देण्यात आला.
यावेळी लहुजी शक्तीचे जिल्हाध्यक्ष सुनील शिंदे, कार्याध्यक्ष राजाराम काळे, जिल्हा संघटक लक्ष्मण साळवे, ऋषिकेश उमाप, अभिजीत सकट, अमोल गाडे, उमेश साठे, नामदेव चांदणे, साहेबराव पाचारणे, पोपटराव पात्रे, सागर उमाप, सुनील सकट आदी उपस्थित होते.
सुनील शिंदे म्हणाले की, देशभक्ती व शत्रूंपासून देशाचे संरक्षण हे लहुजी वस्ताद साळवे यांच्याकडून शिकण्यासारखे आहे. त्यांनी अनेक क्रांतीकारक घडविले. लहुजींचा इतिहास अंधारात ठेवण्यात आला असून, त्याला खर्‍या अर्थाने जगापुढे मांडण्याची गरज आहे. स्वातंत्र्याच्या क्रांतीचे महानायक म्हणून त्यांची प्रतिमा असून, युवकांनी त्यांचा आदर्श घेण्याचे आवाहन त्यांनी केले.