लाभार्थ्यांचे धान्य काळ्या बाजारात विक्रीची पोलखोल
अहमदनगर (प्रतिनिधी)- स्वस्तधान्य दुकानदाराच्या विरोधात लाभार्थ्यांचे धान्य काळ्या बाजारात परस्पर विक्री प्रकरणी पारनेर पोलिस ठाण्यात गुन्हा दाखल करण्यात आला आहे. नायब तहसीलदार सुभाष बाबुराव कदम यांच्या फिर्यादीवरुन 18 ऑक्टोबरला बाभुळवाडे (ता. पारनेर) येथील स्वस्त धान्य दुकानदार शिवाजी दगडू जगदाळे यांच्यावर अत्यावश्यक वस्तू अधिनियमच्या कलमान्वये गुन्हा दाखल करण्यात आला आहे.
याप्रकरणी तक्रारदार गजानन जगन्नाथ बोरुडे (रा. बाभुळवाडे) यांनी सदरील स्वस्त धान्य दुकानदाराच्या गैरप्रकाराचे व्हिडिओ पुरावा म्हणून तहसीलदार शिवकुमार आवळकंठे यांच्या मोबाईलवर पाठविले होते. तर बोरुडे यांनी मोबाईलवर तयार केलेले व्हिडिओ सत्य असल्याचे प्रतिज्ञापत्र देखील सादर केले. यानंतर नायब तहसीलदार कदम यांनी बाभुळवाडे येथील स्वस्त धान्य दुकानाची तपासणी केल्यानंतर आवश्यकतेपेक्षा जास्त धान्य साठा आढळून आला, याचा अर्थ नागरिकांना विहित केलेले धान्य न देता, सदरचे धान्य काळ्या बाजारात विक्रीसाठी साठवून ठेवल्याचे निदर्शनास आले.
तर दुकानात प्राधिकारपत्र, योजनानिहाय लाभार्थी कार्ड धारकांची यादी दर्शनी भागात लावलेली नसणे, स्टॉक व सेल रजिस्टर अद्यावत केलेले नसणे, नोकरदार व मानधन घेणार्‍यांचे कार्ड कमी केलेले नसल्याचे त्रुट्या आढळल्या. तर अगोदर पावत्या फाडून धान्य दिलेले नसल्याचे आढळून आले आहे. याप्रकरणी शिवाजी जगदाळे या स्वस्त धान्य दुकानदारावर गुन्हा दाखल करण्यात आला आहे.