लोकशाही वाचवण्याच्या पत्रकांचे वाटप करुन, बॅलेट पेपरवर निवडणुका घेण्याची मागणी
हुकुमशाही राबवून जनतेला गुलाम करण्याचा घाट -जालिंदर चोभे
अहमदनगर (प्रतिनिधी)- इंडिया अगेन्स्ट ईव्हीएम मशीन जन आंदोलनाच्या वतीने प्रजासत्ताक दिनी शहरातील भारतरत्न डॉ. बाबासाहेब आंबेडकर आणि महात्मा गांधी यांच्या पुतळ्यासमोर केंद्र सरकारच्या हुकुमशाहीचा निषेध नोंदवत, लोकशाही वाचवण्याच्या पत्रकांचे वाटप आंदोलनाचे समन्वयक जालिंदर चोभे मास्तर यांनी केले. तर देशातील सर्व निवडणुका ईव्हीएम मशीन हटवून बॅलेट पेपरवर घेण्याची मागणी यावेळी करण्यात आली.
देशाला स्वातंत्र्य मिळून संविधानाने प्रजासत्ताक देश अस्तित्वात आले. मात्र 2014 नंतर मोदी प्रणित भाजप सरकारने हुकुमशाही राबवून जनतेला गुलाम करण्याचा घाट घातला आहे. समाजात द्वेष पसरवून जाती, धर्माच्या नावाखाली भेदभाव निर्माण केला जात आहे. हिंदुत्वावर आधारित राष्ट्रीयत्वाची संकल्पना रुजवली जात आहे. देशभक्तांची संकल्पना देखील बदललली जात आहे. लोकशाही धोक्यात येऊन गुलामगिरीकडे वाटचाल चालू सुरु असल्याचे चोभे मास्तर यांनी प्रसिध्दीपत्रकात म्हंटले आहे.
ईव्हीएम मशीनच्या घोटाळ्यामुळेच भाजप सत्तेवर येत असल्याचा आरोप त्यांनी केला आहे. सरकार शेतकरी, कामगार, व्यापारी, लघु उद्योजकांविरोधात कायदे धोरण राबवून, कॉर्पोरेट कंपन्या व भांडवलदारांच्या हिताचे काम करत आहे. सरकारच्या विरोधात जाणार्‍या लोकप्रतिनिधींना ईडी, सीबीआय, इन्कम टॅक्स सारख्या स्वायत्त संस्थेचा दुरुपयोग करून कारवाईला सामोरे जावे लागत आहे. महागाई, भ्रष्टाचार, बेकारी, बँकांची लुटमारी, दिवाळखोरी, आर्थिक गुन्हेगारी, शिक्षण, आरोग्यासारखे अनेक मूलभूत प्रश्‍नांना बगल देऊन चुकीचे मुद्दे उपस्थित करुन समाजात द्वेष पेरला जात असल्याचेही चोभे यांनी म्हंटले आहे.
तर मोदी सरकारच्या कारकिर्दीत 155 लाख कोटी परदेशी कर्जाचा बोजा वाढला असून, रुपयाचे अवमूल्यन घटून डॉलरच्या तुलनेत रुपया घसरलेला आहे. म्हणून महागाई गगनाला भिडत आहे. नोटाबंदीने काळे धन परत आले नाही. गरीब देशांच्या यादीत भारत आघाडी घेत आहे, तर देशातील काही भांडवलदार जगाच्या श्रीमंताच्या यादीत येत आहे. आर्थिक व सामाजिक विषमतेने देश पोखरला जात असून, ही गुलामगिरीकडे वाटचाल असल्याचे चोभे यांनी स्पष्ट केले आहे.