उद्योजकांचा उत्स्फूर्त प्रतिसाद; गुणवत्ता, उत्कृष्टता आणि सुधारणेसाठी क्वालिटी फोरमची स्थापना
गुणवत्ता संस्थेची खरी ओळख निर्माण करते -जयद्रथ खाकाळ
अहिल्यानगर (प्रतिनिधी)- नगर एमआयडीसीतील उद्योजकांसाठी गुणवत्ता चळवळीला बळ देण्यासाठी ‘आमी’ संघटनेतर्फे आयोजित गुणवत्ता महिना उत्सवाचे आयोजन करण्यात आले होते. या उपक्रमाचे उद्घाटन संदीप महाजन (निवृत्त संचालक, गुणवत्ता अभियांत्रिकी, एल अँड टी) तसेच आमीचे अध्यक्ष जयद्रथ खाकाळ यांच्या हस्ते झाले.
या कार्यक्रमाला चिन्मय सुखटणकर, शशांक कुलकर्णी, राजेंद्र कटारिया, संजय बंदिष्टी, प्रफुल्ल नातू, सुमित सोनवणे, मिलिंद कुलकर्णी, सम्राट देशमुख, गुलशन बोरा, राजीव गुजर, अतुल चाबुकस्वार, विवेक हेगडे, दौलत शिंदे, विजय इंगळे, राहुल बजाज, सचिन पाठक, निनाद टिपूगडे, राजू राऊत, मिलिंद भद्रे, मयूर गवळी, राजेंद्र शुक्रे, अरुण कुलकर्णी, मिलिंद गंधे, अविनाश बोपर्डीकर, सुमित लोढा, रोहन गांधी, दीपक नागरगोजे, प्रज्ञा कटारिया आदी मान्यवरांसह उद्योजक मोठ्या संख्येने उपस्थित होते.
जयद्रथ खाकाळ म्हणाले की, काम करत असताना आपण येणाऱ्या पिढीला काहीतरी देणे आवश्‍यक आहे. उत्कृष्टता, सतत सुधारणा आणि टीमवर्क हे गुणवत्तेचे आधारस्तंभ आहेत. उद्दिष्टे स्पष्ट ठेवून केलेले कामच संस्थेची खरी ओळख निर्माण करते. एकत्रितपणे प्रयत्न केल्यास गुणवत्ता टिकवून ठेवणे शक्य होते आणि नगर एमआयडीसीची ओळख अधिक सक्षम बनणार असल्याचे ते म्हणाले.
संदीप महाजन म्हणाले की, व्यवसाय व ग्राहकांसाठी उच्च-गुणवत्तेची उत्पादने आणि सेवा देणे ही उद्योगांची प्राथमिक जबाबदारी आहे. गुणवत्ता टिकवल्यास स्पर्धात्मकता, ग्राहक निष्ठा व नफा यामध्ये मोठी वाढ होते. आधुनिक गुणवत्ता व्यवस्थापन प्रणाली राबविल्यास चुका, नॉन-कन्फॉर्मन्स कमी होत असून उत्पादनक्षमता वाढते. भारतीय उद्योगांनी जागतिक उद्योगांप्रमाणे गुणवत्ता साधने, प्रक्रिया सुधारणा आणि सतत सुधारणा मॉडेल्स स्वीकारण्याची गरज आहे. पूर्वी स्वतंत्र असलेली उत्पादन, मार्केटिंग, विक्री यांसारखी क्षेत्रे एकत्रित गुणवत्ता दृष्टिकोनातून पाहणे गरजेचे आहे. आपल्या ब्रँडची गुणवत्ता आपणच निर्माण करायची आहे. ग्राहकांचा विश्‍वास निर्माण करणारा उत्तम दर्जा हा उद्योगसंस्कृतीचा पाया असल्याचे त्यांनी सांगितले.
कार्यक्रमात गणेश कोलार यांनी गुणवत्तेबाबत सविस्तर मांडणी करताना पुढील काळात उद्योगांसाठी उपयुक्त उपक्रम राबविण्याची ग्वाही दिली. त्यांच्या मार्गदर्शनाखाली ‘क्वालिटी फोरम’ ची स्थापना करण्यात आली असून, एमआयडीसीतील उद्योगांना एकत्रितपणे ज्ञान, तंत्रज्ञान आणि गुणवत्ता सुधारणा उपक्रम राबविण्यासाठी हे व्यासपीठ मदत करणार आहे. कार्यक्रमाचे सूत्रसंचालन प्रफुल्ल नातू यांनी केले. संजय बंदिष्टी यांनी आभार मानले.