ढवळे यांनी घेतली ज्येष्ठ समाज सेवक अण्णा हजारे यांची भेट
जाणीवपूर्क खाद्यपदार्थांच्या हातगाडी वाल्यांना त्रास दिला जात असल्याचा आरोप
अहमदनगर (प्रतिनिधी)- एमआयडीसी पोलीस स्टेशन हद्दीतील अवैध हातभट्टी दारु व्यावसायिकांवरती कारवाई करण्याची मागणी करुन देखील याकडे दुर्लक्ष केले जात असताना राष्ट्रवादी काँग्रेस (शरद पवार गट) सामाजिक न्याय विभागाचे बाळासाहेब ढवळे यांनी ज्येष्ठ समाज सेवक अण्णा हजारे यांची भेट घेतली. राज्य उत्पादन शुल्क विभागाकडून जाणीवपूर्क खाद्यपदार्थांच्या हातगाडी वाल्यांना त्रास देवून अवैध हातभट्टी दारु व्यावसायिकांना पाठिशी घालत असल्याची बाब हजारे यांच्या निदर्शनास आणून दिली.
राज्य उत्पादन शुल्क विभागाच्या काही अधिकाऱ्यांनी मध्यंतरी हॉटेल आणि ढाब्यावर देशी, विदेशी दारु सेवन करणाऱ्या लोकांवरती कारवाई केली. तर सध्या अवैध हातभट्टी दारु विक्रेत्यांवर कारवाई न करता खाद्यपदार्थांच्या हातगाडीवरती देशी, विदेशी मद्य सेवन करणाऱ्यांना त्रास देऊन हातगाडी चालकांवर कारवाई केली जात असल्याचा आरोप ढवळे यांनी केला आहे.
खाद्यपदार्थांच्या हातगाडीवरती ग्राहक येऊन देशी, विदेशी दारू सेवन करत असतात. मात्र राज्य उत्पादन शुल्क विभागाचे अधिकारी जाणीवपूर्वक त्रास देण्याचे हेतूने तुमच्याकडे व्यवसाय परवाना आहे का? असे विचारुन कारवाई करत आहे.
पोटाच्या उदरनिर्वाहासाठी अनेकांकडे व्यवसाय करण्याचा परवाना नसतो. अशा खाद्यपदार्थ विकणारे हातगाडी व्यावसायिक या गाडीवर आपला कुटुंब चालवत आहे. खाद्यपदार्थांची विक्री करणारे व्यावसायिक दारु विकत नाही. अवैध हातभट्टी दारुचे अनेक अवैध व्यवसाय मोठ्या प्रमाणात चालत आहे. या अवैध हातभट्टी दारुमुळे अनेकांचे संसार उध्वस्त झाले असून, काही मरण देखील पावले आहेत. काहींच्या आशीर्वादामुळे अवैध हातभट्टी दारु विक्री सुरु असल्याचे ढवळे यांनी म्हंटले आहे.
राज्य उत्पादन शुल्क विभागाने खाद्यपदार्थांच्या हातगाडी वाल्यांना त्रास न देता, अवैध हातभट्टी दारु व्यावसायिकांवरती कारवाई करण्याची मागणी ढवळे यांनी केली आहे. अन्यथा शहरातील राज्य उत्पादन शुल्क अधीक्षक कार्यालयासमोर 5 मार्च रोजी गावठी दारूचा स्टॉल लावून आंदोलन करण्याचा इशारा त्यांनी दिला आहे.