महाराष्ट्र राज्य शिक्षक परिषदेचे शासनाला स्मरणपत्र
थकबाकीसह महागाई भत्ता जानेवारी 2026 च्या वेतनासोबत द्यावा -बाबासाहेब बोडखे
अहिल्यानगर (प्रतिनिधी)- केंद्र शासनाने घोषित केल्याप्रमाणे दि. 1 जुलै 2025 पासून 3 टक्के वाढीव महागाई भत्ता लागू करण्याचे शासन आदेश तातडीने निर्गमित करावेत, अशी ठाम मागणी महाराष्ट्र राज्य शिक्षक परिषद यांच्या वतीने करण्यात आली आहे. या मागणीसंदर्भात महाराष्ट्र राज्य शिक्षक परिषदेचे राज्य कार्याध्यक्ष तथा माजी शिक्षक आमदार नागो गाणार यांनी हे स्मरणपत्र मुख्यमंत्री देवेंद्र फडणवीस, उपमुख्यमंत्री एकनाथजी शिंदे, उपमुख्यमंत्री अजित पवार, शालेय शिक्षण मंत्री दादाजी भुसे, शिक्षण सचिव रणजितसिंह देओल तसेच शिक्षण आयुक्त सचिंद्र प्रतापसिंह यांना पाठविण्यात आले असल्याची माहिती शिक्षक परिषदेचे जिल्हाध्यक्ष बाबासाहेब बोडखे यांनी दिली.
केंद्र शासनाने केंद्रीय कर्मचाऱ्यांना दि. 1 जुलै 2025 पासून 3 टक्के वाढीव महागाई भत्ता लागू केला आहे. महाराष्ट्र राज्याच्या विधिमंडळाने यापूर्वी घेतलेल्या धोरणात्मक निर्णयानुसार, केंद्राच्या धर्तीवर राज्य शासकीय कर्मचारी, शिक्षक व शिक्षकेत्तर कर्मचाऱ्यांनाही वाढीव महागाई भत्ता लागू करणे अत्यावश्यक व निकडीचे असल्याचे शिक्षक परिषदेतर्फे नमूद करण्यात आले आहे.
महागाई वाढीच्या पार्श्वभूमीवर राज्यातील शिक्षक व कर्मचाऱ्यांवर आर्थिक ताण वाढत असून, त्यामुळे दि. 1 जुलै 2025 पासून 3 टक्के वाढीव महागाई भत्ता थकबाकीसह मंजूर करावा, अशी भावना राज्यातील शिक्षक व कर्मचाऱ्यांमध्ये असल्याचे स्मरणपत्रात स्पष्ट करण्यात आले आहे.
तसेच शासनाने तातडीने निर्णय घेऊन वाढीव महागाई भत्त्याचा शासन आदेश निर्गमित करावा आणि सदर वाढीव महागाई भत्ता थकबाकीसह माहे जानेवारी 2026 च्या वेतनासोबत वितरित करावा, अशी मागणी महाराष्ट्र राज्य शिक्षक परिषदेच्या वतीने करण्यात आली आहे. राज्य शासनाने या मागणीची गांभीर्याने दखल घेऊन त्वरित सकारात्मक निर्णय घ्यावा, अशी अपेक्षा राज्यातील शिक्षक, शिक्षकेत्तर कर्मचारी व शासकीय कर्मचाऱ्यांनी व्यक्त केली असल्याचे बाबासाहेब बोडखे यांनी म्हंटले आहे.