• Mon. Dec 1st, 2025

शहरात श्रीमद्भागवत गीता दान उपक्रमाची सुरुवात

ByMirror

Dec 4, 2022

श्री सांदिपनी अकॅडमी व इस्कॉनचा श्रीमद्भागवत गीता जयंतीनिमित्त उपक्रम

श्रीमद्भागवत गीतांचे संकलन करुन विद्यार्थी व युवकांना भेट देण्याचा संकल्प

अहमदनगर (प्रतिनिधी)- जीवन जगण्याचा योग्य मार्ग दाखविणार्‍या व भ्रमाच्या पाशातून काढून यशाच्या मार्गावर घेऊन जाणार्‍या श्रीमद्भागवत गीतेचे ज्ञान विद्यार्थी व युवकांना ज्ञात होण्यासाठी श्री सांदिपनी अकॅडमी व इस्कॉन अहमदनगरच्या वतीने श्रीमद्भागवत गीता दान उपक्रमाचे प्रारंभ करण्यात आले. श्रीमद्भागवत गीता जयंतीनिमित्त सुरु करण्यात आलेल्या या अभियानाद्वारे देणगीदारांकडून श्रीमद्भागवत गीतेची पुस्तकं स्विकारली जाणार असून, ही पुस्तकी शालेय विद्यार्थी व महाविद्यालयीन युवकांना वाचण्यासाठी भेट दिली जाणार आहेत. या अभियानात सहभागी होऊन देणगीदारांना श्रीमद्भागवत गीता देण्याचे आवाहन अकॅडमीचे व्यवस्थापकीय संचालक तथा इस्कॉनचे कनई गोविंदादास (के. बालराजू) यांनी केले आहे.


कनई गोविंदादास म्हणाले की, श्रीमद्भागवत गीता सत्याचे ज्ञान पसरवते. गीतेमध्ये जीवनाचे संपूर्ण सार सांगितले आहे, ज्यामध्ये कर्मयोग, ज्ञानयोग, भक्तियोग या शिकवणींचा समावेश आहे. धार्मिक मान्यतेनुसार या दिवशी श्रीकृष्णाने अर्जुनाला गीतेचे ज्ञान देऊन ऐहिक आसक्तीतून मुक्त केले. गीतेने भौतिक समस्यांचे आध्यात्मिक निराकरण होते. तर कलयुगात समाधानी जीवन जगण्यासाठी भगवद्गीता हा सर्वोत्तम उपाय आहे. या ज्ञानाने युवा पिढीचे जीवन निश्‍चित बदलणार असल्याचे त्यांनी स्पष्ट केले.


भावी पिढी सुसंस्कारी करण्याचा या अभियानाचा उद्देश आहे. गीतेने युवकांना योग्य आणि अयोग्य यातील फरक समजणार आहे. भगवान श्रीकृष्णांनी अर्जुनाला धर्म आणि कर्म समजावून सांगितला. जीवन जगण्याचे तसेच धर्म आणि कर्मांचे पालन करण्याचे महत्त्व गीतेच्या उपदेशात सांगितले आहे. या कर्मभूमीत अर्जुनाप्रमाणे परिस्थितीवर मात करण्यासाठी गीताचे ज्ञान दिशादर्शक असल्याचेही गोविंदादास यांनी सांगितले आहे.

या अभियानात सहभागी होऊन श्रीमद्भागवत गीता दान करण्यासाठी किंवा घेण्यासाठी कनई गोविंदादास यांना मो.नं. 9067022358 या नंबरवर संपर्क करण्याचे सांगण्यात आले आहे.


Leave a Reply

Your email address will not be published. Required fields are marked *