वंचित घटकातील मुलांसह बालदिन उत्साहात साजरा

चाईल्ड लाईन, मराठी पत्रकार परिषद, जिल्हा बाल संरक्षण कक्षाचा संयुक्त उपक्रम

आकाशात तीरंगे फुगे सोडून, देश की ताकत हम सब बच्चेच्या घोषणा

अहमदनगर (प्रतिनिधी)- स्नेहालय संचलित अहमदनगर चाईल्ड लाईन, मराठी पत्रकार परिषद व जिल्हा बाल संरक्षण कक्षाच्या संयुक्त विद्यमाने देशाचे पहिले पंतप्रधान पंडित जवाहरलाल नेहरु यांच्या जयंती निमित्त लालटाकी येथील त्यांच्या पुतळ्यास्थळी वंचित घटकातील मुलांसह बालदिन उत्साहात साजरा करण्यात आला. चाईल्ड लाईन व बालभवनच्या विद्यार्थ्यांनी भारत माता की जय…., देश की ताकत हम सब बच्चे…, जोडो जोडो भारत जोडो… च्या घोषणा देत आकाशात फुगे सोडले. तर अहमदनगर जिल्हा बालविवाह मुक्त करण्यासाठी उडान अंतर्गत बालविवाह प्रतिबंध अभियान-2022 ची घोषणा करुन सुरवात करण्यात आली.

प्रारंभी पंडित जवाहरलाल नेहरु यांच्या पुतळ्यास पुष्पहार अर्पण करुन अभिवादन करण्यात आले. यावेळी जिल्हा परिषद माध्यमिक विभागाचे शिक्षणाधिकारी अशोक कडूस, सहाय्यक कामगार आयुक्त नितीन कवले, मराठी पत्रकार परिषदेचे मन्सूर शेख, कामगार अधिकारी यास्मिन शेख, विशेष बाल पोलीस अधिकारी बी.बी. नंदुरकर, जिल्हा बाल संरक्षण अधिकारी वैभव देशमुख, स्नेहालयाचे संचालक हनिफ शेख, चाईल्ड लाईनचे समन्वयक महेश सुर्यवंशी, माध्यमिक शिक्षण विभागाचे विस्तार अधिकारी दत्तात्रय कवळे, अन्सार सय्यद, एनसीसीचे विनायक चौधरी, भैय्या बॉक्सर, बालकल्याण समिती सदस्य अ‍ॅड. अनुराधा येवले आदी उपस्थित होते.

प्रास्ताविकात प्रवीण मुत्याल म्हणाले की, 19 हजार पेक्षा जास्त बालकांना न्याय, हक्क मिळवून देण्याचे काम चाईल्ड लाइनने केले आहे. ही सेवा अविरतपणे सुरू आहे. मागील दोन वर्षात कोरोना काळात पालक गमावलेल्या विद्यार्थ्यांना बालसंगोपन योजनेच्या माध्यमातून त्यांचे पुनर्वसन करण्यात आले आहे. चाईल्ड लाईन बालकांच्या हक्कासाठी अहोरात्र काम करणारी संस्था असल्याचे त्यांनी स्पष्ट केले. पाहुण्यांचे स्वागत मन्सूर शेख व महेश सूर्यवंशी यांनी केले.

शिक्षणाधिकारी अशोक कडूस म्हणाले की, आजची लहान मुले ही उद्याचा भविष्य आहे. त्या मुलांचे कर्तृत्व फुलवण्यासाठी प्रत्येकाने योगदान देण्याची गरज आहे. वंचित घटकातील विद्यार्थ्यांना आधार दिल्यास त्यांच्यामधून चांगले नागरिक घडणार असून, त्यांच्या भवितव्यासाठी विशेष लक्ष देण्याची गरज आहे. या भावनेने चाईल्ड लाईनचे सुरु असलेले कार्य कौतुकस्पद असल्याचे त्यांनी सांगितले. तर या सामाजिक कार्यासाठी नेहमी सहकार्य राहणार असल्याचे त्यांनी स्पष्ट केले.
वैभव देशमुख म्हणाले की, बालकांचे निरागस आयुष्य जपण्यासाठी आपण प्रयत्न सुरु असून, त्या दिशेने कार्य सुरु आहे. जिल्ह्यात बालविवाह गंभीर प्रश्‍न बनला असून, ते रोखण्याची गरज निर्माण झाली आहे. बालकांच्या हक्काचे संरक्षण झाल्यास खर्या अर्थाने बाल दिन साजरा होणार असल्याचे त्यांनी सांगितले. पोलीस निरीक्षक बी.बी. नंदुरकर यांनी पोलीस दलाच्या माध्यमातून बालकांच्या न्याय, हक्काची जपणूक केली जात असल्याचे सांगून, यासाठी विशेष पथक स्थापित झाले असल्याचे स्पष्ट केले.

हनीफ शेख म्हणाले की, बालकांना चांगले जीवन जगता यावे व त्यांचे चांगले आयुष्य घडविण्यासाठी स्नेहालय व चाईल्ड लाइन योगदान देत आहे. जिल्हा बालविवाह मुक्त करण्यासाठी उडान बालविवाह अभियानाची त्यांनी घोषणा केली. या अभियानाद्वारे संपूर्ण जिल्ह्यात गावोगावी महिनाभर जनजागृती अभियान राबविण्यात येणार आहे. या यात्रेची बालदिनी सुरुवात झाली असून, 15 डिसेंबरला याचा समारोप शहरात होणार असल्याची त्यांनी माहिती दिली.
एनसीसीच्या विद्यार्थ्यांनी सायकल रॅली काढली. पाहुण्यांच्या हस्ते सायकल रॅलीला झेंडा दाखवून सुरुवात करण्यात आली. या रॅलीच्या माध्यमातून शहरात बालविवाह थांबविणे, बालकामगार रोखणे, बालकांच्या हक्काचे संरक्षण करण्याची जनजागृती करण्यात आली. या कार्यक्रमात झोपडपट्टीमधील असंघटित, आर्थिक दुर्बल घटक असलेले बालके सहभागी झाली होती. कार्यक्रमाचे सूत्रसंचालन अनुजा मुळे यांनी केले. आभार महेश सुर्यवंशी यांनी मानले. कार्यक्रम यशस्वी करण्यासाठी चाईल्ड लाईनचे समुपदेशक आलिम पठाण, सदस्य शाहिद शेख, राहुल कांबळे, राहुल वैराळ, उषा खोल्लम, मनिषा बनकर आदी चाईल्ड लाईनच्या टिमने परिश्रम घेतले.