विजेत्या मल्लास हॉलमार्क असलेली 24 कॅरेटची अर्धा किलो सोन्याची गदा बीलासह देणार
अहमदनगर (प्रतिनिधी)- शहरात तब्बल दीड कोटी रुपये खर्च करुन होत असलेल्या राज्यस्तरीय छत्रपती शिवराय केसरी निमंत्रीत कुस्ती स्पर्धा 20 ते 23 एप्रिल दरम्यान शहरातील वाडीयापार्क मैदानावर रंगणार आहे. महाराष्ट्र राज्य कुस्तीगीर परिषदेच्या मान्यतेने भारतीय जनता पार्टी, शिवसेना व अहमदनगर जिल्हा तालीम संघाच्या वतीने कुस्त्यांचा थरार नगरकरांसह कुस्तीप्रेमींना अनुभवता येणार आहे. या स्पर्धेतील विजेत्या मल्लास हॉलमार्क असलेली 24 कॅरेटची अर्धा किलो सोन्याची गदा (किंमत सुमारे 35 लाख) जीएसटीच्या बीलासह बक्षीस स्वरुपात देण्यात येणार असल्याची माहिती आयोजकांनी रविवारी झालेल्या पत्रकार परिषदेत दिली.
भारतीय जनता पार्टी, शिवसेना व अहमदनगर जिल्हा तालीम संघाची संयुक्त पत्रकार परिषद शहरात पार पडली. यावेळी पंडित दीनदयाळ पतसंस्थेचे चेअरमन वसंत लोढा, भाजपचे ज्येष्ठ नेते अभय आगरकर, भाजपचे युवा नेते सुवेंद्र गांधी, भाजपचे माजी जिल्हाध्यक्ष प्रा. भानुदास बेरड, शिवसेनेचे जिल्हा प्रमुख अनिल शिंदे, शहर प्रमुख दिलीप सातपुते, जिल्हा तालिम संघाचे अध्यक्ष वैभव लांडगे, सचिन जाधव, महेश लोंढे, नगरसेवक प्रदीप (भैय्या) परदेशी, प्रशांत मुथा, भाजपचे संघटनमंत्री अ‍ॅड. विवेक नाईक, माजी नगरसेवक सुनिल भिंगारे, तालिम संघाचे खजिनदार पै. नाना डोंगरे, शहराध्यक्ष नामदेव लंगोटे, आनंद शेळके, युवा मोर्चाचे आशिष आनेचा, कॅन्टोमेंट बोर्डाचे माजी सदस्य रवी लालबोंद्रे, संजय छजलाणी, आकाश कातोरे आदी पदाधिकारी उपस्थित होते.
कुस्ती खेळाला चालना देऊन गतवैभव प्राप्त करुन देण्याच्या उद्देशाने महाराष्ट्रात पहिल्यांदाच भव्य निमंत्रित कुस्ती स्पर्धेचे आयोजन करण्यात आले आहे. लाल मातीच्या आखाड्यात व मॅटवर कुस्त्या रंगणार आहेत. एक मातीचा आखाडा व दोन गादीचा आखाडा तयार करण्याचे काम सुरु आहे. या स्पर्धेत राज्यातील दिग्गज मल्लांच्या कुस्ती पाहण्याची सुवर्णसंधी मिळणार असून, स्पर्धेतील विजेत्या मल्लास कुस्तीच्या इतिहासात प्रथमच अर्धा किलो सोन्याची गदा मिळणार आहे. तसेच द्वितीय विजेत्यास 2 लाख व तृतीय विजेत्यास एक लाख रुपयाचे बक्षीस देण्यात येणार असल्याची माहिती यावेळी देण्यात आली.
ही स्पर्धा माती व गादी विभागात 48, 57, 61, 65, 70, 74, 79, 86 किलो वजन गटात होणार आहे. तर अंतिम छत्रपती शिवराय केसरी ओपन गट सोन्याच्या गदेसाठी 86 ते 135 किलो वजनगटात रंगणार आहे. विविध वजन गटातून विजयी होवून पुढे आलेल्या मल्लांमधून अंतिम कुस्ती लाल मातीच्या आखाड्यात होणार आहे. 48, 57, 61, 65, 70, 74 या वजन गटातील पहिल्या तीन क्रमांकाच्या मल्लांना अनुक्रमे 1 लाख, पन्नास हजार व तीस हजार रुपये तसेच 79, 86 किलो वजन गटातील पहिल्या तीन क्रमांकाच्या मल्लांना अनुक्रमे 1 लाख 25 हजार, 75 हजार व 50 हजार रुपयांचे बक्षिस देण्यात येणार आहे. स्पर्धेसाठी डिजीटल गुणफलकची व्यवस्था देखील करण्यात आलेली आहे.
नगर शहराच्या वैभवात भर पडेल अशी भव्यदिव्य ही स्पर्धा होत असून, स्पर्धेस गुरुवारी (दि. 20 एप्रिल) सकाळी सुरवात होणार आहे. यादिवशी सकाळी सहभागी मल्लांचे वजना प्रमाणे गट पाडण्यात येणार आहेत. स्पर्धेचे उद्घाटन शुक्रवारी (दि.21 एप्रिल) रोजी सायंकाळी 5 वाजता भारतीय जनता पार्टीचे प्रदेशाध्यक्ष चंद्रशेखर बावनकुळे यांच्या हस्ते होणार आहे. या स्पर्धेचे स्वागताध्यक्ष माजी पालकमंत्री प्रा. राम शिंदे असून, यावेळी खासदार डॉ. सुजय विखे, खासदार सदाशिव लोखंडे, माजी आमदार बबनराव पाचपुते, आमदार मोनिका राजळे, अर्जुनवीर पुरस्कार वीजेते पैलवान काका पवार, महाराष्ट्र केसरी पै. गुलाबराव बर्डे, पै. अशोक शिर्के, पै.संदीप भोंडवे आदींसह विविध क्षेत्रातील मान्यवर उपस्थित राहणार आहेत. यानिमित्त नगर शहरातून सकाळी स्पर्धेत सहभागी झालेल्या मल्लांची उंट व घोड्यांवरून वाजत गाजत भव्य मिरवणूक काढण्यात येणार आहे.
तीन दिवस चालणार्‍या या कुस्ती स्पर्धेची अंतिम लढत रविवारी (दि.23 एप्रील) रोजी होणार असून राज्याचे मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या हस्ते विजेत्या मल्लास सोन्याची गदा देण्यात येणार आहे. पालकमंत्री राधाकृष्ण विखे पाटील यांच्या अध्यक्षतेखाली होणार्‍या या कार्यक्रमास राज्याचे सहकार मंत्री अतुल सावे, उद्योग मंत्री उदय सामंत, पाणीपुरवठा मंत्री गुलाबराव पाटील, उत्पादन शुल्क मंत्री शंभूराज देसाई, शिवसेनेचे सचिव संजय मोरे आदींसह भाजप व शिवसेनेचे राज्यस्तरावरील दिग्गज नेते व पदाधिकारी उपस्थित राहणार आहेत. स्पर्धेसाठी येणार्‍या मल्लांची व पंचांची निवास, भोजन व्यवस्था उत्तम प्रकारे करण्यात आली असल्याचे पत्रकार परिषदेत सांगण्यात आले आहे.
छत्रपती शिवराय केसरी कुस्ती स्पर्धेसाठी राज्यातून सुमारे बाराशे पैलवान येणार असून, तब्बल दहा महाराष्ट्र केसरी यामध्ये उतरणार आहेत. यामध्ये खास आकर्षण असलेले पैलवान सिकंदर शेख, माऊली कोकाटे, महाराष्ट्र केसरी शिवराज राक्षे, पृथ्वीराज पाटील, हर्षवर्धन सदगीर, महेंद्र गायकवाड, बाला रफिक यांच्यासह जिल्ह्यातील नामवंत मल्ल स्पर्धेत सहभागी होणार आहेत.