मंगल गेटला बजरंग ग्रुपने उपलब्ध करुन दिली चित्रपट पाहण्याची संधी
आपल्या पूर्वजांचा धगधगता इतिहास आजच्या पिढीला ज्ञात होण्याची गरज -सचिन जाधव
नगर (प्रतिनिधी)- बजरंग ग्रुपच्या वतीने शहरातील मंगल गेट येथे महिला दिनाच्या पार्श्वभूमीवर खास महिलांसाठी छत्रपती संभाजी महाराज यांच्या शौर्याचा इतिहास दाखवणारा छावा चित्रपट दाखविण्यात आला. चित्रपट पाहण्यासाठी आलेल्या महिलांनी छत्रपती शिवाजी महाराज व संभाजी महाराजांचा जय घोष केला.
शिवसेनेचे शहर प्रमुख सचिन जाधव व सामाजिक कार्यकर्ते मयुर मैड यांच्या पुढाकाराने महिलांसाठी चित्रपटाचे आयोजन करण्यात आले होते. चित्रपट पाहण्यासाठी परिसरातील नागरिकांसह अबालवृद्धांनी मोठी गर्दी केली होती. छत्रपती शिवाजी महाराजांच्या पुतळ्यास अभिवादन करुन चित्रपटाचे प्रारंभ करण्यात आले. यावेळी हजारोंच्या संख्येने महिला व शिवभक्तांनी गर्दी केली होती. अंगावर शहारे आणणाऱ्या छत्रपती संभाजी महाराजांचा संघर्ष पाहून प्रेक्षकांच्या डोळ्यांच्या कडा पाणवल्या. चित्रपटासाठी उत्कृष्ट डॉल्बी साऊंड सिस्टिम व एलईडी वॉलची व्यवस्था करण्यात आली होती. चित्रपट सुरू असताना छत्रपती संभाजी महाराजांच्या शौर्य व मुघलांना दिलेली झुंज आदी प्रसंगाने उपस्थितांनी टाळ्यांच्या कडकडाटात संभाजी महाराजांचा जयघोष केला. महिलांसाठी आसन व्यवस्था करण्यात आली होती. चित्रपट पाहण्यासाठी आलेल्या नागरिकांमुळे संपूर्ण परिसर गजबजला होता.
सचिन जाधव म्हणाले की, छत्रपती शिवाजी महाराजांनी स्वराज्य निर्माणासाठी जीवन सर्मपण केले. तर संभाजी महाराजांनी धर्मासाठी मृत्यूला कवटाळले. आपल्या पूर्वजांचा धगधगता इतिहास आजच्या पिढीला ज्ञात होण्याची गरज आहे. शिवकालीन इतिहास हा आजच्या युवकांना प्रेरणा व स्फूर्ति देणार असल्याचे त्यांनी सांगितले. माजी नगरसेविका आश्विनी जाधव यांनी महिलांचे स्वागत केले. यावेळी अक्षय लावंड, सचिन सापते, निखिल भिंगारे, बबन थोरात, आकाश लावंड, कृष्णा कुंदुरकर, श्याम सोनवणे, चारू भिंगारे, लखन तोडमल, भाऊ सापते, अजिंक्य शेळके, विकी इंगळे, साई भोरे, आदित्य कोंडे आदी उपस्थित होते.