श्री सांदिपनी अकॅडमी व इस्कॉनच्या वतीने शहरात श्रीमद्भागवत गीता वाटपला सुरुवात
गीतेमध्ये जीवनाचे संपूर्ण सार -गिरीवरदरी दास
अहमदनगर (प्रतिनिधी)- कर्मयोग, ज्ञानयोग, भक्तियोगाने जीवनात यश व समाधान आहे. याची परीपूर्ण शिकवण श्रीमद्भागवत गीतेतून मिळत असते. गीतेमध्ये जीवनाचे संपूर्ण सार सांगितले असून, सुसंस्कारी पिढी व समाज घडविण्यासाठी गीतेचे वाचन करुन त्याचे आचरण करण्याचे आवाहन इस्कॉन मंदिराचे अध्यक्ष गिरीवरदरी दास यांनी केले.
श्रीमद्भागवत गीतेचे ज्ञान विद्यार्थी व युवकांना ज्ञात होण्यासाठी श्री सांदिपनी अकॅडमी व इस्कॉन अहमदनगरच्या वतीने विद्यार्थी, युवक व नागरिकांना मोफत श्रीमद्भागवत गीता वाटप उपक्रमाचे प्रारंभ करण्यात आले.
यावेळी गिरधारी दास बोलत होते. नुकतेच नालेगाव येथील निरीक्षण व बालसुधारगृह मधील विद्यार्थी व जिल्हा रुग्णालयातील डॉक्टर, परिचारिका व रुग्णांना श्रीमद्भागवत गीतेचे वाटप करण्यात आले. याप्रसंगी अकॅडमीचे व्यवस्थापकीय संचालक तथा इस्कॉनचे कनई गोविंदादास (के. बालराजू), उद्योजक पंकज नेत्रादास, ब्रम्हचारी राघवचरण दास, सत्यगोविंद दास, डॉ. प्रणाली राठोड उपस्थित होत्या.
कनई गोविंदादास (के. बालराजू) म्हणाले की, धार्मिक मान्यतेनुसार या दिवशी श्रीकृष्णाने अर्जुनाला गीतेचे ज्ञान देऊन ऐहिक आसक्तीतून मुक्त केले. गीतेने भौतिक समस्यांचे आध्यात्मिक निराकरण होते. जीवन जगण्याचे तसेच धर्म आणि कर्मांचे पालन करण्याचे महत्त्व गीतेच्या उपदेशात सांगितले आहे. कलयुगात समाधानी जीवन जगण्यासाठी भगवद्गीता हा सर्वोत्तम उपाय आहे. या ज्ञानाने युवा पिढीचे जीवन निश्‍चित बदलणार असल्याचे त्यांनी सांगितले.
श्रीमद्भागवत गीता जयंती दिनापासून संस्थेच्या वतीने श्रीमद्भागवत गीता स्विकारण्याचे उपक्रम हाती घेण्यात आले होते. या उपक्रमास चांगला प्रतिसाद लाभून मोठ्या प्रमाणात श्रीमद्भागवत गीता जमा करण्यात आले आहे. नुकतेच त्याचे वितरण सुरु करण्यात आले.
यावेळी सामाजिक कार्यकर्ते मोहसीन सय्यद, जिल्हा रुग्णालयाच्या परिचारिका आशा ठुबे, संगिता वैष्णव, गिता क्षीरसागर, नंदा जाधव, चंद्रकला धोत्रे आदी उपस्थित होते. कार्यक्रमाचे सूत्रसंचालन डॉ. सिमा कदम यांनी केले. आभार पंकज नेत्रदास यांनी मानले.
