चार दिवस रंगणार फुटबॉलचा थरार
मैदानातून घडलेली मुले जीवनात प्रगती साधतात -कर्नल बिजॉय आर
नगर (प्रतिनिधी)- मैदानी खेळातून सुदृढ पिढी निर्माण होणार आहे. मैदानातून घडलेली मुले जीवनात प्रगती साधतात. विद्यार्थ्यांनी फक्त पुस्तकी ज्ञानात न गुंतता मैदानात उतरण्याचे आवाहन एमआयआरसीचे कर्नल बिजॉय आर. (सेना मेडल) यांनी केले.
युवा कार्यक्रम एवं खेल मंत्रालय (भारत सरकार) आणि राष्ट्रीय खेळ संवर्धन संस्था (एनएसपीओ) यांच्या मान्यतेने स्टेअर्स फाउंडेशन व अहिल्यानगर जिल्हा क्रीडा अधिकारी कार्यालय यांच्या संयुक्त विद्यमाने वाडियापार्क क्रीडा संकुल येथे आयोजित करण्यात आलेल्या आंतर शालेय मुला-मुलींच्या फुटबॉल स्पर्धेच्या उद्घाटनाप्रसंगी एमआयआरसीचे कर्नल बिजॉय आर. बोलत होते. याप्रसंगी प्रमुख पाहुणे म्हणून कर्नल कर्नल नसिर ध्रुव, डॉ. प्रशांत पटारे, एन.एफ.सी. फुटबॉल क्लबच्या अध्यक्षा नमिता फिरोदिया, ऑक्झिलियम कॉन्व्हेंट स्कूलच्या मुख्याध्यापिका सिस्टर नीलिमा, गुलमोहर स्पोर्ट्स क्लबचे अध्यक्ष तथा उद्योजक जोएब खान, स्टेअर्स फाउंडेशनचे अध्यक्ष विजय कमलनाथ (टायरवाले), उपाध्यक्ष डॉ. प्रताप पटारे, विल्सेंट फिलिप्स, सचिव प्रसाद पाटोळे, सहसचिव सुभाष कनोजिया, खजिनदार मयूर टेमक, निलेश हराळे, वृषाली पटेकर, जावेद शेख आदींसह खेळाडू मोठ्या संख्येने उपस्थित होते.
पुढे कर्नल बिजॉय आर. म्हणाले की, जगात सर्वोत्कृष्ट खेळ म्हणून फुटबॉल कडे पाहिले जाते. आपण स्वत: फुटबॉलच्या मैदानातून पुढे आलो असून, विद्यार्थी दशेत फुटबॉल खेळताना स्ट्रायकरची भूमिका पार पाडल्याचे सांगून त्यांनी खेळाच्या मैदानातील जुन्या आठवणींना उजाळा दिला.
नमिता फिरोदिया म्हणाल्या की, स्पर्धेतून कौशल्य दाखविण्याची संधी मिळते. खेळाडूंनी आपले उत्कृष्ट खेळाचे कौशल्य दाखवावे, या स्पर्धेतून खेळाडूंची जिल्हा संघात निवड होणार आहे. नगर शहर हे फुटबॉल खेळाचे माहेरघर असून, उत्कृष्ट खेळाडू पुढे येत आहे. तर अशा स्पर्धेतून खेळाडूंचा चालना मिळत असल्याचे त्यांनी सांगितले.
सिस्टर नीलिमा यांनी फुटबॉल स्पर्धेच्या उत्कृष्ट नियोजनाचे कौतुक करुन, हारणारे एकदा प्रयत्नाने नक्की जिंकतात, सातत्य ठेवा मैदानात आपले उत्कृष्ट देण्याचे खेळाडूंना आवाहन केले. डॉ. प्रताप पटारे यांनी खेळाडूंना स्पर्धेसाठी शुभेच्छा दिल्या. याप्रसंगी क्रीडा शिक्षक भीम पवार, मनीष राठोड, अक्षय नायडू, आशिष भिंगारदिवे, संदीप दरंदले, वृषाली पटेकर, सौरभ सानप, सोनाली साबळे, सुभाष कनोजिया, मयूर टेमक, प्रसाद पाटोळे आदी उपस्थित होते.
स्पर्धेच्या प्रारंभी मशाल प्रज्वलित करून खेळाडूंनी मैदानातून संचलन केले व पाहुण्यांकडे मशाल प्रदान करुन स्पर्धेची सुरुवात केली. यावेळी खेळाडूंना प्रातिनिधिक स्वरुपात स्पर्धेचा ध्वज प्रदान करण्यात आला. मैदानाचे पूजन करुन फुटबॉलला किक मारुन पाहुण्यांच्या उपस्थितीत या स्पर्धेला बुधवारी (दि.13 नोव्हेंबर) प्रारंभ झाले. चार दिवस वाडियापार्कच्या मैदानावर फुटबॉलचा थरार रंगणार असून, या स्पर्धेत 15 शालेय संघांनी सहभाग नोंदवला आहे. यामध्ये 14 व 17 वर्षे आतील मुले व सतरा वर्षातील मुलींचे फुटबॉल सामने नॉक आऊट पध्दतीने रंगणार आहे. या स्पर्धेचा अंतिम सामना शनिवारी (दि.16 नोव्हेंबर) होणार आहे. स्पर्धेचे पंच म्हणून सागर चेमटे, शशी गायकवाड, जोएल पिल्ले, ओम दंडवते, परेश म्याना, प्रणव पंडित, ऋषी कनोजिया काम पाहत आहे.
या स्पर्धेसाठी मुख्य प्रायोजक मॅक केअर सुपर स्पेशलिटी हॉस्पिटल, सहप्रायोजक म्हणून एस्टेल केमिकल्स, हिंदुस्तान टायर्स, एस स्पेशालिटी, अमर टेक्नोक्राफ्ट, त्रिमूर्ती मेटल अलॉइज, साईदीप टायर रिमोल्डिंग, स्वामिनी सर्विसेस यांचे सहकार्य मिळाले आहे. कार्यक्रमाचे सूत्रसंचालन रुपेश पसपुल यांनी केले. आभार विल्सेंट फिलिप्स यांनी मानले.