डिजिटल बाजारात विद्यार्थिनींची पंचेचाळीस हजारांची उलाढाल
विद्यार्थिनी झाल्या छोटे व्यावसायिक डिजिटल मेळाव्याला भरघोस प्रतिसाद
अहिल्यानगर (प्रतिनिधी)- केडगाव येथील महाराणी ताराबाई कन्या विद्यालयात दरवर्षीप्रमाणे आयोजित करण्यात आलेल्या ‘बाल आनंद मेळावा’ या उपक्रमास यंदा उत्स्फूर्त प्रतिसाद मिळाला. डिजिटल व्यवहारावर आधारित असलेल्या या मेळाव्यात विद्यार्थिनीनी लावलेल्या विविध खाद्यपदार्थ व वस्तूंच्या स्टॉलद्वारे तब्बल पंचेचाळीस हजार रुपयांची उलाढाल झाली. डिजिटल व्यवहाराच्या प्रायोगिक शिक्षणाचा हा उत्तम अनुभव ठरला.
विद्यार्थिनींचे हातून डिजिटल मार्केटचे यशस्वी नियोजन करण्यात आले होते. पाणीपुरी, पापडभाजी, वडापाव, भेळ, समोसा, मसाला ताक, ढोकळा, चकली, इडली-चटणी, लस्सी, गुलाबशरबत, फ्रुट स्टॉल, पॅटीस, चीज सॅण्डविच, पावभाजी, नुडल्स, मेदुवडा, आप्पे, हरभरा उसळ चाट, रसना, ज्वारीची खिचडी, गुलाबजाम तसेच शालेय परसबागेतील भाजीपाला आणि विविध खेळणी असे जवळपास 30 पेक्षा अधिक स्टॉल विद्यार्थिनी व पालकांनी उभारले होते.
मेळाव्यातील सर्व व्यवहार शिक्षकांच्या गुगल पे आणि फोन पेद्वारे डिजिटल पद्धतीने पूर्ण करण्यात आले. यामुळे विद्यार्थिनींना नाणीनोटा ओळख, खरेदी-विक्री, नफा-तोटा, आकडेमोड, डिजिटल पेमेंट प्रक्रिया यांचे प्रत्यक्ष ज्ञान मिळाले. कार्यक्रमाचे अध्यक्षस्थानी संस्थेचे सचिव बबनराव कोतकर होते, तर प्रमुख पाहुणे म्हणून उद्योजक दौलतराव शिंदे उपस्थित होते. संस्थेचे संचालक जयद्रथ खाकाळ, खजिनदार प्रल्हाद साठे, सहसचिव रावसाहेब सातपुते, सोनवणे राजेश, संजय निक्रड तसेच मुख्याध्यापीका वासंती धुमाळ व सर्व शिक्षककर्मचारी मोठ्या संख्येने उपस्थित होते.
उद्योजक दौलतराव शिंदे म्हणाले की, हे डिजिटल युग आहे. विद्यार्थिनींनी ह्या मेळाव्यात डिजिटल व्यवहार शिकणे ही काळाची गरज आहे. या उपक्रमातून विद्यार्थिनींना लहान वयातच व्यावहारिक कौशल्ये आणि व्यावसायिक दृष्टिकोन मिळतो. शाळेतील सातत्याने चालणारे नवनवीन उपक्रम पाहता या कन्या विद्यालयाची राज्यात नोंद होण्यासारखे असल्याचे त्यांनी सांगितले.
अध्यक्षीय मनोगतात बबनराव कोतकर म्हणाले की, आज विद्यार्थिनींचा आनंदाचा दिवस आहे, पण अभ्यासाकडे दुर्लक्ष न करता अशा उपक्रमांतून स्व-घडणीकडे वाटचाल करण्याचे स्पष्ट केले.
मुख्याध्यापीका वासंती धुमाळ यांनी विद्यार्थिनींना व्यावहारिक ज्ञान मिळावे, आकडेमोड सहज जमावी आणि डिजिटल व्यवहारांचे कौशल्य विकसित व्हावे म्हणून दरवर्षी हा बाल आनंद मेळावा आयोजित केला जात असल्याची माहिती दिली. प्रास्ताविक छाया सुबे यांनी केले. सूत्रसंचालन भारती गुंड यांनी केले. आभार जयश्री कोतकर यांनी मानले.