सोमवारी शहरातून निघणार शोभायात्रा
विविध धार्मिक व सांस्कृतिक कार्यक्रमात भाविकांना सहभागी होण्याचे आवाहन
अहमदनगर (प्रतिनिधी)- श्रीकृष्ण जन्मोत्सवानिमित्त पंजाबी सनातन धर्मसभेच्या सर्जेपूरा येथील श्री राधा-कृष्ण मंदिरात कृष्ण जन्माष्टमी उत्सवाचे आयोजन करण्यात आले आहे. सोमवारी (दि.26 ऑगस्ट) दुपारी 3 वाजता शहरातून भव्य शोभायात्रा काढण्यात येणार असून, विविध धार्मिक कार्यक्रमाचे आयोजन करण्यात आले असल्याची माहिती ट्रस्टचे अध्यक्ष राकेश गुप्ता यांनी दिली.
सोमवारी रात्री युगल शरण महाराजांच्या मधुर वाणीत श्रीकृष्ण भजन व रासलीलेचा कार्यक्रमासह मध्यरात्री श्रीकृष्ण जन्मोत्सव साजरा केला जाणार आहे. मंगळवारी (दि.27 ऑगस्ट) सकाळी 11 वाजता गोपालकाळा भजन व दुपारी 12 वाजता बाल दहीहंडीचे आयोजन करण्यात आले आहे.
तसेच महिला ग्रुपच्या वतीने कृष्ण लीलेवर वेशभुषा स्पर्धा घेण्यात आली आहे. 1 वाजता महाआरती व त्यानंतर महाप्रसादाने कार्यक्रमाची सांगता होणार आहे. या विविध धार्मिक कार्यक्रमात समाजबांधवांना सहभागी होण्याचे आवाहन ट्रस्टच्या सर्व विश्‍वस्तांनी केले आहे.